തിരുക്കാഴ്ച

അണിനൂപുരമണിയും പദതളിരും നഖമുനയും
മണിമുത്തുകളണിചേരുമൊരരയും തിരുവയറും
വിരിമാറിടമണിയും  വനമലർമാലയു മലിവിൻ
കണികാരസമുതിരും മിഴിയിണയും പുരികുഴലും

നിറപുഞ്ചിരി നിറയും മുഖവടിവും ചൊടിയഴകും
നറുപീലികളിടതിങ്ങിന കരിവാർമുടിയിഴയും
തുടുശോഭയൊടണിനെറ്റിയിലണിയും തൊടുകുറിയും
പുതുചന്ദനമണമോലുമൊരുടലും കരതലവും

കണികാണ്മതിനടിയർക്കുരുവരമേകുക കൃഷ്ണ
മതിമോഹന മനമോഹന മഹിതാശ്രയ കൃഷ്ണ
മുരളീധര മുരനാശക മുസലീസഹജാത
ഗുണമേകുക ഗുരുവാകിന ഗുരുവായു പുരേശ

പാതി

എന്തോ കളിച്ചു, മുഴുമിച്ചതുമില്ല, വേഷം 

സ്വന്തം നിലയ്ക്കു മതിയാക്കി നടന്മടങ്ങി 

അന്ത്യംവരേയ്ക്കുകഥയാടിയരങ്ങു വാഴാ-

നെന്തേചിലർക്കു കഴിവേകിയതില്ലയീശൻ 

 

ആത്മനാദം

നാദബ്രഹ്മതരംഗഘർഷണമനു (ശബ്ദ)

സ്യൂതം മനോവീണതൻ 

വിദ്യുത്ഭാവവികാരമേഖല മഥി 

ച്ചുണ്ടാകുമക്കമ്പനം 

അദ്വൈതശ്രുതിചേർന്നു ലോലഹൃദയ 

സ്ഥാനത്തു സംഗീതമാ-

യാദ്യന്തം കുടികൊള്ളുവാൻ മമ കനി 

ഞ്ഞേകൂ വരം ശാരദേ

തർക്കം

മുമ്പില്ലാത്തവിധം ജയിച്ചു ഭരണം

നേടുമ്പൊളും മുഖ്യനാ-

യമ്പേതർക്കമിതെന്തു ദുർവിധി, മതി

യ്ക്കില്ലേവിവേകം, ശരി 

വമ്പേറുന്നൊരനിശ്ചിതത്വമൊഴിയാൻ

പേരാർന്ന ശീട്ടൊന്നു കൈ-

ക്കുമ്പിൾക്കുള്ളിലറിഞ്ഞുനീട്ടുക കിളി

പ്പെണ്ണേ,യിതേ പോംവഴി

പുണ്യപൂരം

അഞ്ചമ്പപ്രാണദാതാ, വചരചരജഗത്

ക്കാരണൻ സഞ്ചിതാഭം

ചെഞ്ചുണ്ടിൽ ചേർത്തുവയ്ക്കും മുരളിക

വനിതാനെഞ്ചകത്തൻപുവീഴ്ത്തേ

കൊഞ്ചിക്കൊണ്ടെത്തിയോമൽ കവിളിണ

തഴുകും മഞ്ജുളാംഗീ വിലാസം

തഞ്ചാരെക്കണ്ട രാധാമിഴി, മിഴിയിണയിൽ

തഞ്ചിയേകട്ടെ പുണ്യം 

ബാലവൃദ്ധം

ബാല്യം രണ്ടു വിധത്തിലൊന്നു, പറയാ 

റാവുമ്പൊളേക്കും പിട-

ഞ്ഞാലോചിക്കുവതിന്നു തെല്ലിട തരാ 

തെങ്ങോ മറഞ്ഞോടിടും 

മേലാലെത്തുവതെങ്കിലോ പിടിവിടാ 

തൊപ്പംവരും വാർദ്ധക-

ക്കാലം, കല്യപുരാതനോർമ്മ പകരും 

ശ്രീപാദമെത്തും വരെ 

തൂവൽമനം

വീണ്ടും വീണ്ടുമുയർന്നു മോഹശലഭം 

പാറിപ്പറക്കേ തിക-

ച്ചുണ്ടാകില്ലിഹ തൃപ്തിയാർക്കുമവരിൽ 

കൂടും ഭയാശങ്കകൾ 

ആശാപാശമൊഴിഞ്ഞു തന്നിലഭയം 

നേടും മനസ്സോ കനം 

ലേശംപോലുമിയന്നിടാതെ വിഹരി 

ക്കുന്നിങ്ങിളം തൂവൽപോൽ 

ഭൂതനാഥം

സമാധാനമായ് ജീവനാളം ജ്വലിക്കാ -

നമേയാത്മശാന്തി പ്രകാശം വിളങ്ങാൻ

ഉമാനാഥഗോവിന്ദപുത്രന്റെ പാദം 

സ്മരിക്കാം സ്ഥിരം ഭൂതനാഥാ തുണയ്‌ക്കൂ 

നവതി മംഗളപത്രം

രാകാചന്ദ്രസമാനമാസ്യ,മണിമെയ്

ചോരും ലഘുത്വം സദാ

ശ്രീകൃഷ്ണാർപ്പിത മാനസം, കരളകം

സംതൃപ്തിയാൽ പൂരിതം

ഭേദാഭേദമകന്ന ചിന്ത മിഴിയിൽ

തങ്ങും നവോന്മേഷ,മി-

ശ്രീദേവി പ്രിയമേകിടുന്നു, ജനനീ-

മാതാവു തൊണ്ണൂറിലും



കാലം നിശ്ചലമാണു മാതൃസവിധേ

യെത്തും നരർക്കെന്നു,മെ-

ക്കാലത്തും ജനനിയ്ക്കുബാലകർ വളർ,

ന്നെത്രയ്ക്കു പോന്നീടിലും

ഒന്നിച്ചെത്തിയനുഗ്രഹത്തിനു കൊതി

യ്ക്കുന്നൂകിടാങ്ങൾ ദ്രുതം

നന്നായ്തൊട്ടുതലോടി നന്മ നവതീ

നാളിൽ ചൊരിഞ്ഞമ്മയും



നിസ്സംഗയാം നാരിയൊരാളു സംതൃ-

പ്താനന്ദപൂർവ്വം വിഹരിപ്പു ശാന്തം

തൊണ്ണൂറിലെബ്ബാല്യവുമാസ്വദിക്കും

മുത്തശ്ശിയമ്മയ്ക്കു മമ പ്രണാമം


സർവേശൻ തുണയേകട്ടെ

നീളും ജീവിത യാത്രയിൽ

ആരോഗ്യത്തോടെവാണീടാൻ

മുത്തശ്ശ്യമ്മയ്ക്കു സന്തതം

പളുങ്കിലപ്പാ

നീറുമുള്ളമുലഞ്ഞു കണ്ണു കലങ്ങിയാമയ 

ഭാരവും 

പേറിയെത്തുമനേകഭക്തജനത്തിനുള്ളഴ 

ലൊക്കെയും 

നീറിടും മിഴിയാലുഴിഞ്ഞെരിചാമ്പലാക്കു

മുമാപതേ 

കൂറെനിക്കുമനല്പമേക പളുങ്കിലപ്പ! 

മഹാപ്രഭോ 

വൻജടയ്ക്കഹിമാല ഗംഗയുമിന്ദുവും തിരു 

മേനിയിൽ 

ചാമ്പലും കരിചർമ്മവും ഗരളം തടഞ്ഞൊരു 

കണ്ഠവും 

കാമനാശകനേത്രവും മമമാനസേ 

തെളിയിച്ചു ദു-

ശ്ചിന്തമായ്ച്ചു ശിവം നിറയ്ക്ക പളുങ്കിലപ്പ! 

മഹാപ്രഭോ

കൂടെവന്നുപിറന്ന സങ്കടജാലമിന്നു 

വളർന്നു വ-

ന്നാധി തന്നുടൽനീറ്റിടുന്നൊരുവേളയുള്ളു

പിടഞ്ഞുഞാൻ 

വീണുകേഴുകയാണു ശങ്കര!, ദുഃഖവേര- 

തറുത്തു വൻ-

രക്ഷയേകുക പാർവതീശ പളുങ്കിലപ്പ 

മഹാപ്രഭോ 

നിത്യസുന്ദര നിലാവിനൊത്തകൃപചേർത്തു 

ഭക്തജനമാനസം 

സത്വസദ്ഗുണസമൃദ്ധമാക്കിയനവദ്യരക്ഷ 

വരമേകിയും 

മൃത്യുജീവനിതിഭീതിമാറ്റിയറിയേണ്ടതാ 

മറിവുനൽകിയും

ശ്രീതിരണ്ടു ശുകമംഗലത്തമരുമീശനെ 

ത്തൊഴുതു കുമ്പിടാം