വല്മീകം

മോഹത്തിൻ മണികൂട്ടി വച്ചു മനുജൻ കുന്നൊന്നു തീർത്തിട്ടതിൻ

ചുറ്റും വേലി വളച്ചുകെട്ടി തനതാം
സാമ്രാജ്യമുണ്ടാക്കയാം

എന്നാൽക്കാലപിപീലികാക്രമണമപ്പാവം
നിനച്ചില്ല,നാ-

ളേറേയെത്തുവതിന്റെമുൻപു മണികൾ വൽമീകമായ്കഷ്ടമേ!

സരസ്വത്യൈ നമഃ

ചിത്താകാശസരോരുഹത്തിലനിശം
വീണാനിനാദംപൊഴി-

ച്ചാത്താനന്ദരസം കലർന്നു വിലസും
വാഗ്ദേവി മൂകാംബികേ

നിത്യജ്ഞാനമരന്ദവാണി മമ നാത്തുഞ്ചത്തു
തത്തീടുവാൻ

തീർത്തും നീ ശ്രുതിചേർക്കുകെന്റെ ഹൃദയം, സാരം രുചിക്കട്ടെ ഞാൻ

ആസക്തി

പാടാറില്ലൊരുപാട്ടു,ചിത്ര രചനാ
ക്കമ്പംപൊടിക്കില്ല, ഞാ-

നാടാറില്ല,തുകാണലില്ല കുതുകം
കൂടില്ല യാത്രയ്ക്കു മേ

കൂടാറില്ല സുഹൃദ് സഭയ്ക്കു, കവിത
പ്പെണ്ണാളുമൊത്തീമലർ-

ക്കട്ടിൽക്കെട്ടിലമർന്നിരുന്നു വിഷയാ- സക്തിയ്ക്കു കീഴ്പ്പെട്ടു ഞാൻ

വ്യായാമം

ഓടാനൊരുങ്ങു മടികൂടാതെടോ വലിയ
പാടാണിതെന്ന പടി താൻ

മൂടിപ്പുതച്ചു നടുകോടുന്നവണ്ണമിതു
പാടില്ലുറക്കമിനിയും

കേടറ്റദേഹബലമോടിങ്ങു മോടിയൊടു
കൂടേണമെങ്കിലുടനേ

കൂടുന്നചിത്തബലമോടെന്നുമോടു-
മൊരുപാടെന്നുചൊല്ലിയുണരൂ

പെരുവനക്കമ്പം

കരിനിരനിറശോഭയോടെ നിൽക്കും

പെരുവനവീഥിയിലൊന്നു ചെന്നുമേളം

പരിചൊടു കരതാളമിട്ടുകേൾക്കാൻ

പെരുകിടുമുള്ളിലെനിയ്ക്കുമോഹമെന്നും

വിഫലമോഹം

അരനിമിഷമടങ്ങിടാത്തകുഞ്ഞിൻ

ചിരികളികണ്ടു രസിച്ചിരുന്നുപോകേ

ഒരുതവണ തിരിച്ചു ബാലനാകാൻ

പെരുകിടുമുള്ളിലെനിയ്ക്കുമോഹമെന്നും