ആനക്കാരോട്

കൊമ്പനാനയെയിവ്വണ്ണം
അന്പില്ലാതെ വലയ്ക്കുകില്‍
വമ്പു കാട്ടുകയല്ലാതെ
തുമ്പി കെട്ടുകയില്ലിവന്‍

വിദേശക്കളി

കളിമറന്നു വിദേശമണഞ്ഞനാള്‍
തളരുവോളമിരന്നു പരാജയം
കളി മുഴുക്കനെകണ്ടതുമോര്‍ത്തിതാ
വെളിവു കെട്ടു നടപ്പു ജനങ്ങളും

തുണ

പിണഞ്ഞു വന്നബദ്ധമെന്റെ ജീവിതത്തിലാകവേ

കണക്കു കൂട്ടലൊക്കെയങ്ങു തെറ്റിയൊരു നേരമേ

തുണയ്ക്കു കൂടെ നീയോരാള്‍ മനസ്സിനുള്ളില്‍ വേണമി-

ക്ഷണത്തിലല്ലിനാഴിനീന്തിയക്കരയ്ക്കു പോകുവാന്‍

ഐ.ടി ക്കാര്‍ക്ക്

തീര്‍ത്താത്തീരാതെയെന്നും വിഷമത തരുമജ്ജോലിയാല്‍ ഭ്രാന്തരാക്കീ

ച്ചേര്‍ത്താച്ചേരാതെ പിന്നേം പണമതുപെരുകും കാഴ്ചയാലന്ധരാക്കീ

തീര്ത്തുംകൊള്ളാതെപാരില്‍പ്പലരെയുമിതുപോല്‍ യൌവ്വനേ ജീര്‍ണ്ണരാക്കീ

പാര്‍ത്താലത്യന്തദു:ഖം തരുമൊരു പണിയായ് മാറിയിന്നൈട്ടിരംഗം