മതസാരം

 നാമരൂപമതു പോലെ ഭാവവും

മാറിമാറിവരുമെങ്കിലെന്തു ഹാ!

പ്രേമസാരമുറയും മതങ്ങൾ തൻ

ലക്ഷ്യമൊ,ന്നുലക നന്മതന്നെയാം!!

ക്രിസ്ത്മസ്

 അന്യാദൃശാർദ്രകരുണാരസമാർന്നചിത്താ-

ലന്യന്റെ ദുഃഖമലിയിച്ചു കളഞ്ഞിടാനായ്

മന്നിൽപ്പിറന്നിടയപുത്ര,നവന്റെ രൂപം

മിന്നട്ടെ മാനവമനസ്സിതിലെന്നുമെന്നും

സമത

നിൻപേരാണെന്റെ പേർ, ശ്രീ
തിരളുമളിനിറം തന്നെയാണെന്റെ വർണ്ണം

ഗോപാലൻ കൃഷ്ണ! നീ, ഞാ,നടവുകളെറിയും ശിഷ്യവർഗ്ഗത്തെ,മേയ്പ്പോൻ

താൻ പാകം വന്ന കള്ളൻ ജനമനമഖിലം
കട്ടു വാഴുന്നു, പക്ഷേ-

കാപട്യം മാത്രമെന്നിൽ സമതവരുവതി, ന്നെന്തു ചെയ്യേണ്ടു ചൊല്ലൂ

വി കെ എൻ

വീക്കേയെന്നെന്ന ദേഹം രചനയിലധികം നർമ്മമുൾക്കൊണ്ടുമർമ്മ-

ത്തൂക്കോടെത്തല്ലിടാനാ,യനുപമ കഴിവും ധൈര്യവും ചേർന്നെഴുന്നോൻ

ആക്കംകൂടുന്നവാക്കാ, ലടിമുടിതനതാം
പാത വെട്ടിത്തുറന്നോ-

നെക്കാലത്തും പ്രസക്തൻ, പ്രണതി കഥകൾതൻ സത്തവാർത്തോരു സത്തേ!

ബാലരക്ഷ

സാനന്ദം ലീലയാടും ശിശുവളരുവതി-

ന്നൊപ്പമാ ചിത്തരങ്ങ-

ത്തൂനം തട്ടാതെ നന്മക്കൊടിമുളയിടുവാ,

നൊത്ത നൽഭക്തിയേറാൻ

അന്നത്തെക്കാരണോൻമാ,രധിക സമയവും

ശ്രദ്ധയോടുദ്യമിച്ചാ-

നിന്നത്തെക്കാര്യമോർത്താൽ ശ്ശിവശിവ!

ഇവിടാ,രുണ്ടു നേർപ്പാത കാട്ടാൻ!

ഓട്ടപ്പത്തായം

പത്തായത്തിലെനെല്ലു നല്ലരിയതായ്‌ മാറുന്നതിൻപിന്നിലെ-

ക്കിത്താബൊന്നുമറിഞ്ഞതില്ലതറിയാൻ പണ്ടില്ല താല്പര്യവും

അത്താഴത്തിനുതെണ്ടലിങ്ങു തൊഴിലായ് തീർന്നന്നുതൊ,ട്ടെൻമന-

പ്പത്തായത്തിലനേകമോട്ട,യിനിഞാ- നെന്തോന്നു ചിന്തിക്കുവാൻ!