നിറക്കൂട്ട്

മഴപെയ്തളവന്നുവാനില-

ങ്ങിഴയിട്ടൂ ബഹുവർണ്ണരാജികൾ

അഴകിന്നൊളികണ്ടു വിസ്മിതം

വഴിയുന്നീക്കവിതാങ്കണത്തിലും

കാഴ്ച

പാടം പാടേനികത്താം പലനിലകളെഴും
കെട്ടിടം കേറ്റി വാഴാം

തോടുംകുന്നും മറക്കാം പുഴ,വനമിവയും
ചിത്രമാക്കീട്ടു തൂക്കാം

കൂടുന്നത്യാർത്തിയാലേ സകലവുമധികം
താറുമാറായൊടുക്കം

നാടും മുക്കുന്നവണ്ണം പ്രളയമണയവേ കണ്ടുകണ്ണീരൊഴുക്കാം

കുട്ടിയും പൂതവും

പൊയ്മുഖങ്ങളുമണിഞ്ഞു വന്നിടും

പൂതനും തിറയുമെന്നെ നോക്കവേ

പേടിപൂണ്ടുമിഴി പൊത്തിയോടുമ-

ക്കാലമോർത്തു കുളിരാർന്നു മാനസം

കുട്ടിടെ പേരെന്താ?..എന്ത്??

പൂണുനൂലുവടിവൊത്തുഭസ്മവും

ചൂഴ്ന്നമേനിയിലുമെന്തുകാര്യമേ

വീണുപൊയ്മുഖമനേകവും തുലോം

പേരുകേട്ടു'നിരവദ്യ'യെൻമകൾ!!

മുഖലക്ഷണം

മുഖംനോക്കി ഭാഗ്യം പറഞ്ഞിടാനാ-

മുഖംനോക്കവേഞെട്ടി പൊയ്മുഖം താൻ

മുഖത്തൊന്നുപൊട്ടിച്ചു തള്ളയോതീ

മുഖം കൊണ്ടുപോരേണ്ട വയ്യ വയ്യേ

വളർച്ച

പടവലം വളരുന്നതു പോലെയി-

ക്കടവളർന്നുവരുന്നതു കാണണം

മടിയെഴാത്തൊരു കർഷകനോതവേ

കുടിലബുദ്ധിയുമൊന്നു പകച്ചുപോയ്‌

2018 തൃപ്പൂണിത്തുറ കൊടിയേറ്റ ദിനം

ഉത്സവത്തിനു തുടക്കമേകുവാൻ

രാഗഭാവമിയലും ദിലീപനും

മേളമോടു ഗജരാജ വൃന്ദവും

ഗോപിതൊട്ട കളിയും പുറപ്പെടാം

കാത്തിരിപ്പ്

ഗോപനാരികളൊത്തു ലീലയസംഖ്യമാടിയ ബാലകാ

ഗോപവല്ലഭ കാണുവാനൊരു മോഹമുള്ളിലുദിയ്‌ക്കയായ്

താപസന്നുമലഭ്യമാകിയ രൂപമെന്നതറിഞ്ഞുമുൾ-

താപമോടെ നിനപ്പുനിന്നുടെ പാദപങ്കജമിന്നു ഞാൻ

രുഗ്മിണീ സ്വയംവരം

കൃഷ്ണനാണു മമവല്ലഭന്നതിൽ

മാറ്റമില്ലയിനിയാരുചൊൽകിലും

പണ്ടുതന്നെമനമേകിയെന്നുമാ-

രുഗ്മിയോടുകഥ ചെയ്തു രുഗ്മിണീ


ചേദിരാജനുടെ ജായയാകുവാ-

നാരുപോണു മമ നായകൻ വരും

നോക്കിനിൽക്കെയവനോടുകൂടെഞാ-

നാത്തമോദമിനി തേരിലേറിടും


കേട്ടുഞെട്ടിയ സഭാനിവാസികൾ

കേട്ടുപിന്നെരഥയൊച്ച രുഗ്മിയും

പൂണ്ടുയുദ്ധവെറിയെങ്കിലും പരം

തല്ലുകൊണ്ടു ഭഗവാന്റെ ഭാഗ്യവാൻ


എന്തുചൊല്ലുമവസാനമേവരും

തോറ്റുപോയിയതിലില്ലയത്ഭുതം

പിന്നെരുഗ്മിണിയുമൊത്തുദേവനും

ദ്വാരകയ്ക്കുവിടകൊണ്ടു മോദരായ്

സാഫല്യം

നിത്യസുന്ദരനച്യുതന്റെ വിലാസമെങ്ങടെ യുള്ളിലും

തത്വചിന്തയുറഞ്ഞ ഭക്തി നിറച്ചിടേണമനാരതം

സത്വബോധമുറച്ചു ഭേദമകറ്റി
ശാശ്വത ശാന്തിയും

നിത്യമുക്തിയുമേകിജന്മമൊടുങ്ങിടട്ടെയനന്തരം

കാവ്യ സാഗരം

മുളപൊട്ടിവിടർന്നചിന്തയെ-

ത്തളരാതങ്ങനെ രാകിമാനവർ

അളവുറ്റുപണിഞ്ഞിതൂഴിയി-

ന്നൊളിചിന്നുന്നൊരുകാവ്യസാഗരം

ഗുരുകൃപ

അളവറ്റ ഗുരുക്കളുള്ളയി-

ക്കളമൊന്നിന്റെ നടുക്കുവീഴവേ

ചളിയൊക്കെയകന്നുപോകുമീ-

യളവാരും കവിയായിമാറുമേ

സ്നേഹമാപനി

പലതരംപരിവർത്തമളക്കുവാ-

നുലകിലുണ്ടു പലേവിധ യന്ത്രവും

നിലവിലില്ലൊരുമാപനിചൊല്ലുവാ-

നലയിടുന്നനുരാഗമനോഗതം

കൃഷ്ണ ലീല

മണ്ണു തിന്നു നടകൊണ്ട ബാലനാം

കണ്ണനുണ്ണിയെയുരൽക്കു കെട്ടവേ

കണ്ണുരുട്ടിയ യശോദ കണ്ടുപോ-

ലുണ്ണിവായിളവറ്റ കാഴ്ചകൾ

മാതൃസ്നേഹം

കളങ്കമില്ലാത്തൊരു മാതൃവായ്പ-

പ്പളങ്കുചിത്തത്തെയലങ്കരിപ്പൂ

വിളംബമില്ലാതെ ചൊരിഞ്ഞിടുമ്പോ-

ളളന്നു നോക്കുന്നതസാധ്യമല്ലോ

സുഖാർത്ഥി

അളവറ്റ ധനം സുഖമല്ലതിനാ-

ലളവറ്റ ഭയം വളരും കണിശം

അളവറ്റു സുഖം പെരുകുന്നതിനാ-

യളവറ്റു ഭജിയ്ക്ക ഭവന്റെപദം

കാലാരി

കാലമിങ്ങുഗതികൂട്ടിയോടിയ-

ക്കാലനിന്നുവരുമെന്നു കണ്ടുനാം

കാലകാല പദപങ്കജം വരും-

കാലമെന്നുമിനിയോർത്തു വാഴണം

പുരുഷോത്തമൻ

മുന്നിലുണ്ടു പല ദുർഘടങ്ങൾ വൻ

സങ്കടക്കടലുമെന്നു കാൺകിലും

ധീരനായ പുരുഷോത്തമന്നതും

കർമ്മമെന്നിതിനിനച്ചുവാണിടും

ത്രിവിക്രമൻ

ബലിയുടെ വിളയാട്ടംമൂലമദ്ദേവലോകം

നിലവിളിമിഴിനീരും പൂണ്ടുവന്നോരുനേരം

നലമൊരുവടുരൂപം പൂണ്ടുവന്നിട്ടു വേഗം

ബലമൊടുബലിയേയും ദാസനായ്മാറ്റിയീശൻ

നൃസിംഹം

കൂർത്തുമൂർത്തയിരുദന്തവും നഖം

നീർത്തി,യാർക്കു,മെരിയുന്ന നേത്രവും

പാതിസിംഹമപരം നരന്നുമാ-

രീതിപൂണ്ടൊരവതാരമേ തൊഴാം

ഒറ്റ

എത്രപേരു മമകൂടെയെങ്കിലെ-

ന്തത്രയേകനതറിഞ്ഞിടുന്നു ഞാൻ

പേർത്തുമോർത്തു വിലപിക്കയില്ലെടോ

തീർത്തയാളിതുവരച്ചതല്ലയോ

പത്രം

അച്ചടിച്ചതുമുഴുക്കെയെങ്ങനേ

വിശ്വസിപ്പതു മനുഷ്യരല്ലയോ

തെറ്റുവന്നിടുമെയേതുകാലവും

സത്യമല്ലെയവതാരമല്ലനാം

അവതാര രഹസ്യം

എത്രയെത്രയവതാരപൂരുഷർ

തത്രവന്നു പിറകൊണ്ടുവെങ്കിലും

മാറ്റമേതുമിയലാതെമാനുഷ-

ന്നൂറ്റമോടു ധരവാണിടുന്നിതേ

വിധി വിഹിതം

ചോടുതേടിയണയുന്നനാരിയിനിയെന്നു
മീമലയിലെത്തുവാൻ

കൂടെവേണമൊരുനൂറുകാക്കിനിര
പമ്പതൊട്ടതിലിരട്ടിയും

കോടതിയ്ക്കുപറയാനെളുപ്പമതുകേട്ടു
ചാടിയവരെത്രയും

പേടിപൂണ്ടു മതിലുംപണിഞ്ഞുപരി
രക്ഷണത്തിനിതി സംഗ്രഹം

കേറ്റിയിറക്കൽ

കല്ലുരുട്ടി മലകേറ്റിവേഗമ-

ക്കല്ലുതള്ളിയടിപറ്റിടുന്നതും

പണ്ടു കേട്ട കഥ വീണ്ടുമേവരും

കണ്ടുപുണ്യമലതന്നിലിന്നു ഹാ!

ചൊട്ടയിലെ ശീലം

ചൊട്ടയിട്ട പല ശീലവും മനം

വിട്ടിടാ ചുടലയെത്തുവോളവും

മട്ടുകണ്ടു മലയൊന്നുകേറുവാ-

നൊട്ടനേകസമയം പിടിച്ചിടും

മനിതി

മനിതി സംഘമൊരുങ്ങിവരുന്നിതാ

തടയിടാനവിടുണ്ടു ജനംസദാ

മതിലു കെട്ടി സുരക്ഷയൊരുക്കുമോ

കഥപറഞ്ഞുമടക്കിയയക്കുമോ

നവോത്ഥാനം

തവിടുപോലെ പൊടിച്ചുനിരത്തണം

ചവറു കൂടിയ ചിന്തകളേവരും

ഇവിടെയീമതിലിന്നിതു ലക്ഷ്യമാ-

യുയരണം വരണം സമഭാവവും

തുറുപ്പ്‌

വെല്ലാനേറെയെളുപ്പമാണിരുതരം
ജാതിയ്ക്കു വെട്ടാണതി-

ന്നെല്ലാമൊത്തതുരുപ്പുമുണ്ടു നിറയെ
പ്പൊയ്യല്ല, കാണേണമോ

പുല്ലാണിന്നെതിരാളി,വന്നു വെറുതേ
നാണംകെടാതിപ്പൊഴി-

ന്നെല്ലാക്കൂട്ടരുമൊത്തുനിന്നു വിജയം
നേടേണമോ ചൊല്ലിടൂ

മതിലുപണിക്കാർ

"അതിലെയോടിയയാളുകളാരുവാൻ?"

"മതിലു കെട്ടിയ 'യൂപ്പി'നിവാസികൾ"

"പതിയെയിങ്ങു വിളിക്കുക,യൊത്തെടോ

പുതിയതൊന്നിനി മേസ്തിരിയാക്കിടാം"

സ്നേഹമതിൽ

മതിലുകെട്ടിയതിർത്തി തിരിക്കുകിൽ

പതിരെഴാത്തൊരു ബന്ധമുറച്ചിടും

മതിലുകെട്ടി മനസ്സുമറയ്ക്കുകിൽ

കതിരിടില്ലൊരു ബന്ധവുമോർക്കണം

ഭാഗ്യസൂക്തം

മുൻപെട്ട വെള്ളിക്കൊരു ഭാഗ്യസൂക്തം

നിൻസേവയായിട്ടു കഴിച്ചിടുന്നൂ

അൻപോടു നീ ഞങ്ങടെ ഭാഗ്യദോഷം

തന്നാജ്ഞയാലിന്നു തിരുത്തി നൽകൂ

മതിൽ

അബല ജീവനു രക്ഷയൊരുക്കുവാ-

നതിബലം മതിലൊന്നിനി കെട്ടണം

ചിലവതോർത്തുഭയന്നകലേണ്ട ചെം-

നിറമതാകിലൊരമ്പതു തന്നിടാം

ശേഷക്കാഴ്ച

പോരാട്ടച്ചൂടു കൂടും നിരവധി സമരം കണ്ട നൂറ്റാണ്ടു പോയി-

പ്പാരാവാരത്തിൽവീണൂ സിതരവരൊഴിയും രാജ്യഭാരം ലഭിയ്ക്കേ

നേരറ്റും കാര്യസാധ്യക്കളിപെരുകുമിടം മാത്രമാണിന്നു ചുറ്റും

പോരട്ടേയഞ്ചു വർഷം മരമടയജനം വോട്ടുമായെന്നുമെത്തും

നേതൃഗുണം

കട്ടപ്പാര,യരയ്ക്കു കത്തി, പരിഘം, വാള,ങ്ങുതോക്കും തരം

കിട്ടും പോലെയിടയ്ക്കെടുത്തു കൊലയും സഭ്യേതരം ഭാഷയും

കുട്ടിച്ചാത്തനൊടൊത്ത രൂപഗുണവും പൂണ്ടുള്ള നേതാക്കളെ-

ക്കിട്ടാനത്ര ഞെരുക്കമില്ല ഭരണപ്പേക്കൂത്തിലെക്കാലവും

മുരളീരവം

പൊന്നോടക്കുഴലിന്റെ നാദമിനിയും കേട്ടില്ല കാതോർക്കവേ

മിന്നും പട്ടുടയാട കണ്ണു നിറയേ കണ്ടില്ല നോക്കീടവേ

വന്നെത്തീ യമദൂതരിങ്ങു വിവശം ഞാൻ വീണുപോംമുൻപു നീ

വന്നെന്നെത്തവവേണുവെന്നുകരുതിക്കൊണ്ടങ്ങു പോകേണമേ

കാണികളും ഫലവും

പുച്ഛിച്ചു കൂവിയ ജനത്തിനുനേരെ നീട്ടാ-

മിച്ഛിച്ചപോലെയിനി വീരവിരാട ഹസ്തം

അച്ഛിന്നമാം ജയപരമ്പരനേടിയാലോ

സ്വച്ഛന്ദമായ് വിലസിടും തവ മേന്മ മേന്മേൽ

പ്രേമവാകം

മണ്ണും ധൂളിയുമന്യമായൊരുദരപ്പാത്രത്തി-
ലേകാകിയായ്

കണ്ണുംനട്ടുകിടന്നു കാലമണയേ
സോല്ലാസമിങ്ങെത്തി നീ

വിണ്ണോർനാരിയുമൊട്ടസൂയയൊടുതാൻ നോക്കിക്കൊതിക്കുമ്പൊളെൻ

പെണ്ണേ കണ്മണിയെന്റെകയ്യിലമരൂ പാൽപ്പുഞ്ചിരിച്ചുണ്ടുമായ്

കാലരഥം

കളിവീടുചമച്ചൊരുബാല്യമഹോ

കളിവിട്ടുവളർന്നുമറഞ്ഞകലേ

കളിയല്ലിതുകാലമഹാനടനം

കളിയെന്നുനിലയ്ക്കുമതാരറിവൂ

പൂമൊട്ടുകൾ

പലനാളൊരുമൊട്ടുപോലെ നീ

പുലരും കാലപഥത്തിലീവിധം

നലമോടൊരു പൂവിനാർദ്രമാം

നിലയും വന്നിടുമിങ്ങസംശയം

അക്കാലം

പണ്ടെന്റെ കയ്യിന്റെ പിടുത്തമെങ്ങാൻ

മിണ്ടാതയച്ചാലതിഭീതിയോടേ

ചുണ്ടുംകടിച്ചേങ്ങിയിരുന്ന കാലം

വീണ്ടും വരില്ലിങ്ങു വളർന്നു നീയും

ഒരു അഭിമുഖ ഓർമ്മ

കാശൊട്ടെറിഞ്ഞുംസ്ഥിരജോലിനേടാ-

നാശിച്ചു വന്നോരുടെമദ്ധ്യമീഞാൻ

വീശിത്തളർന്നുള്ളിരുകയ്യു കെട്ടീ-

ട്ടാശാവിഹീനം മിഴിപൂട്ടി നിൽപ്പൂ

കള്ളൻ വായ്നോക്കിയാൽ

വണ്ടികേറിയവളങ്ങുപോവതിൻ
മുമ്പുചെന്നു മണിമാല ചൂണ്ടുവാൻ
വമ്പുകൂടിയവരിങ്ങു ചന്തവും
കണ്ടുനിൽക്കുവതു കഷ്ടമല്ലയോ

വായ്പ്പുണ്ണും കൊതിയും

പൂണ്ടമാങ്ങമുളകുപ്പിലിട്ടതും

വേണ്ടുവോളമവർതിന്നിടുമ്പൊഴും

ചുണ്ടിലാകെയൊരു പുണ്ണുവന്നു ഞാൻ

കണ്ടുനിൽക്കുവതു കഷ്ടമല്ലയോ

അഭ്യർത്ഥന

നീലനീരദ നഭസിലെത്രയും

ചേലിയന്നു വിലസുന്ന ഭാനു നീ

മേലിലെന്റെപുര ചുട്ടെരിയ്ക്കൊലാ

ഓമലൊന്നവിടെ നിദ്രയുണ്ടെടോ

ജാതകവശാൽ..

അഷ്ടിക്കില്ലത്തുപണ്ടേ വഴിയൊരുചെറുതും നാസ്തി നമ്പൂരിയേറ്റം

കഷ്ടിച്ചൊപ്പിച്ചു വേളി സ്ഥിതി ഗുരുതരമായ്‌ ചെറ്റുകാലം കടക്കേ

വൃഷ്ടിക്കങ്ങിങ്ങുപൊങ്ങും തൃണനിചയസമം പുത്രിമാരെട്ടുപേരും

പുഷ്ടിപ്പറ്റോരു പെണ്ണും  ദ്വിജവരവിധി തേ ജാതകം ജാതി തന്നേ

താതമോഹം

മന്ദംഹസിച്ചു കഥകേട്ടു രസിച്ചുറങ്ങും

ചന്ദ്രാഭചിന്നുമൊരുകുഞ്ഞു വളർന്നു വേഗം

ഇന്ദ്രാദിദേവകളുമൊട്ടുകൊതിച്ചു പോകും

നന്ദാത്മജന്റെസഖിയാകിനരാധപോലേ

സാരോപദേശം

പുത്രി സോദരി ജനിത്രി ജായയും
മിത്രവും വിവിധ സ്വത്വമെങ്കിലും
ആർത്തിപൂണ്ട ഖലനില്ലഭേദമെ-
ന്നോർത്തുവേണമിനി കൂട്ടുകൂടുവാൻ

മകൾ

ദാമ്പത്യച്ചെടി പൂത്തനാളുമുതലേ കാക്കുന്നു നിന്നെസ്സദാ
തുമ്പം വിട്ടിരുമാനസങ്ങളധികം പ്രേമാർദ്രഭാവത്തൊടേ
കമ്പം മൂത്തു വരുന്നകണ്ടു കൊതിയായ് വാഴാനിവർക്കൊപ്പമെ-
ന്നൻപോടോർത്തു വിരിഞ്ഞിറങ്ങിയരികേ തിങ്കൾക്കിടാവെൻ മകൾ

ശാസ്താവു കാക്കട്ടെ മാം

ആചാരപ്പടി കെട്ടുമേന്തി ശരണം ചൊല്ലീട്ടു വന്നോളെയി-
ന്നാചാരപ്പടി കേറ്റിടാതെ തടയാം ലോക്കപ്പിലും  പൂട്ടിടാം
ആചാരപ്പടികിട്ടുമെങ്കിലിവരോ കൂടേ നടന്നെത്തു,മീ-
യാചാരത്തിനു കാണിയായി മരുവും ശാസ്താവു കാക്കട്ടെ മാം...

മുക്തി

എൻ ജന്മാന്തര പുണ്യ പാപ നിചയം കൂട്ടിക്കിഴിച്ചന്നു ഞാൻ
ക്ഷോണീരംഗതലത്തിലേവമുരുവം ചെയ്തോരഹം ബുദ്ധിയായ്
കാമക്രോധ രസം നിറച്ച മനവും ദേഹാഭിമാനങ്ങളും
പൊട്ടിപ്പോകണമിന്നുവേഗമതിനായ് മാർഗം തെളിക്കൂ ശിവേ

ധൃതിയുണ്ട്

പലവക തിരിവുള്ളാപ്പാത കേറീട്ടുവേഗം
നിലയമതണയേണം രാത്രിയാവുന്ന മുൻപേ
കലപില പറയുന്നീ വണ്ടി വേഗത്തിലോട്ടൂ
സ്ഥലപരിചയമില്ലേ പിന്നെയെന്തീയമാന്തം

നോക്ക് കൂലി

നല്ലകാലമധികം കളഞ്ഞവർ
നല്ലവണ്ണമവളേ വളർത്തുവാൻ
വല്ലപേരുമൊരു കണ്ണു കാട്ടിയാൽ
വല്ല പാടുമവളോടിടാവതോ

നോക്കുകൂലി

നോക്കു, കൂലി മുഴുവൻ തരാതെയി-
ച്ചാക്കുകെട്ടുകളിറക്കുകില്ലെടോ
ഒക്കുകില്ല,യിനി വാശിയെങ്കിലോ
നോക്കുകൂലിയുമടച്ചിറക്കണം

ശരണം വിളി

നെയ്‌ത്തേങ്ങ തേങ്ങ,അരി,വെറ്റിലടയ്ക്ക നാണ്യം
കെട്ടാക്കി പൂരുഷരുപോയി വിധിയ്ക്കു മുൻപേ
സ്ത്രീരത്നമെത്തിയൊരുകെട്ടു തലയ്ക്കു മേന്തീ
നാപ്കിൻ നിറച്ചു, വിധിയെക്കളിയാക്ക യാവാം

വിഷം

വിഷയാത്മകമെന്നകം പെരും
വിഷയാസക്തിയിരിക്ക കാരണം
വിഷയീവിഷ നാശനത്തിനായ്
വിഷകണ്ഠപ്രിയദേ തുണയ്ക്ക മേ

നാടു കാണൽ

കഞ്ചാവുധൂമ്രത്തി,ലലിഞ്ഞ നേരം
പഞ്ചാബിലെത്തീയൊരുമാത്രയിൽ ഞാൻ
ചാഞ്ചല്യമെന്യേ മുറിഹിന്ദി ചൊല്ലി-
പ്പഞ്ചാരലേഡീസുകളൊത്തു ചുറ്റീ

ബഡായി വീരൻ

"നെഞ്ചോളമെത്തും വാടിവാളുമായി-
ട്ടഞ്ചാറുപേരുണ്ടവർ ഞാനൊരാളും"
"നിൻചാരെ വന്നപ്പൊ ഭയന്നുവോ?" "ഹേയ്!
ചാഞ്ചല്യമില്ലാതെയടിച്ചൊതുക്കീ!!"

ചഞ്ചല ചിത്തൻ

പൂഞ്ചേല ചന്തത്തിലുടുത്തു ചുണ്ടിൽ
തേൻചോരുമാഭേരിയൊതുക്കി സാകം
നെഞ്ചെയ്യുമമ്പേന്തിയൊരുത്തി വന്നാൽ
ചാഞ്ചല്യമേലാത്ത മനം ചുരുക്കം

കൊതി

ആകപ്പാടേ രസിയ്ക്കാം കലിത സുമശരം കാഞ്ചനം സ്വന്തമാക്കാം
ലോകം കീഴ്മേൽമറിയ്ക്കാം ജനനടുവിലലം
വീരവാദം മുഴക്കാം
ശോകം മർത്യന്റെ കാര്യം മരണസമയവും ഭോഗചിന്താകുലൻ താൻ
നാകത്തിന്നോഹരിയ്ക്കും കൊതി,കൊതിയിതു പോ,ലെന്തു മറ്റൊന്നു മന്നിൽ

ഊണ്

കണ്ടാലാരും ചൊല്ലിടും കഷ്ടമയ്യോ
വേണ്ടായെന്നും തോന്നിടും തക്കവണ്ണം
വെണ്ടക്കായത്തോരനും കൂട്ടി നന്നാ-
യുണ്ടില്ലെന്നാൽ പേർത്തുമങ്ങാർത്തിയേറും

നൈപുണ്യം

പരവധം തൊഴിലാക്കിന വേന്ദ്രരും

ഭരണസാരഥിയാവുകയെങ്കിലോ

വരണ ദോഷഫലം കുലനാശനം

മരണമോ രണമോ,യിനിഭൂഷണം

തുലാവർഷം

അതി തീവ്ര മഴയ്ക്കൊരുസാധ്യതയെ-
ന്നിതി കേട്ടു തുലാമിനിയും കസറും
മതിയാക്കുകൊഴുക്കു ജലാശയമേ-
ധൃതികൂട്ടി നിറഞ്ഞു ചതിയ്ക്കരുതേ

പഴിചാരുവതിന്നു തുടങ്ങിയതോ
പഴയോരുപറച്ചിലു തന്നെയിതും
മഴപെയ്തു തുടങ്ങി 'നശിച്ചമഴേ'!
മഴതോർന്നവഴിയ്ക്കുമതേ പടിതാൻ!!

മഴപെയ്തിടിവെട്ടി വെളിച്ചവുമേ
പഴി ചൊല്ലിമറഞ്ഞു രസം കളയാൻ
കഴിവില്ല സഹിക്കുവതെങ്ങനെ ഞാൻ
മഴയേ കളി നീ മതിയാക്കുവിനാ!

മഴ ബാലികപോലെ ചിണുങ്ങിടവേ
വഴി കാട്ടിയിടയ്ക്കൊരു മിന്നലവൻ
തുഴ പോയൊരു വഞ്ചികണക്കുമനം
പുഴതന്നുടെ മാറിലലഞ്ഞൊഴുകീ

കഴിയില്ല ഭവച്ചരിതം പറകിൽ
കഴിവില്ല പറഞ്ഞിനിതീർപ്പതിനും
കഴിവുള്ളവരോതിയപോലെവരും
കഴിയാത്തമഴേ കുഴയുന്നിഹഞാൻ

നൊമ്പരം

സംഗീതത്തിലലിഞ്ഞു ബാല പകരും 'കാപ്പി'യ്ക്കു പിന്നാമ്പുറം
സന്താനങ്ങളകന്ന സങ്കട രസം താനെന്നതോർത്തോ ജനം
സന്തോഷച്ചെടി പൂത്തു കുഞ്ഞു ഫലവും തന്നൂ ഭവാനെങ്കില-
ന്നെന്താപത്തു പിണഞ്ഞു ഹന്ത! ഹൃദയം വേവുന്നു നോവുന്നു മേ

സ്വാമി ശരണം

കല്ലും മുള്ളുമതേറെയുള്ള വനവും കുന്നും കയറ്റങ്ങളും
തെല്ലും ഭീതിയെഴാതെ കണ്ടു കയറും നാരീജനം സംഘമായ്
മെല്ലെപ്പമ്പയിലാണ്ടു പാതി പുറമെക്കാട്ടീട്ടു ഭംഗ്യാ വരും
ചൊല്ലേറുന്നൊരു കാഴ്ച കണ്ടു ഹൃദയം വേവുന്നു നോവുന്നു മേ

കർമ്മഫലം

വേഷം ഞാനെത്ര കെട്ടീ കരി നരി പുലിയായ്‌ തേളു തേരട്ടയായും
ശേഷം ഹാ! പുണ്യജന്മം ദ്വിജകുല നരനായ് ഭാഗ്യമെന്നേ നിനച്ചൂ
ഭോഷത്തം സംഭവിച്ചൂ മതി മിഴി മനവും മായയാലേ ഭ്രമിച്ചൂ
ദോഷങ്ങൾ കൂടി വന്നൂ ജനനമിതു വൃഥാ വയ്യ നിർത്തുന്നു ശംഭോ

പഴി

കഴിഞ്ഞുപോയനാളിലൊന്നുമേ തുണയ്ക്കുകില്ലയി-
ക്കൊഴിഞ്ഞ പൂവു സുസ്മിതം നിറച്ചതും മറന്നിടും
പഴിയ്ക്കുവാൻ തുനിഞ്ഞിടുന്നതിന്റെ മുൻപു നിങ്ങളും
വഴിയ്ക്കു വീണുപോകുമദ്ദിനം മനസ്സിലോർക്കണം

നമ്മളുടെ അവസ്ഥ

വരുന്ന കൊല്ലമെങ്ങിനേ നടത്തിടും കലാലയം
കുറഞ്ഞിടുന്നുവെഞ്ചിനീയറിങ്ങിനാളു നാൾക്കുനാൾ
നിരത്തിവച്ച കെട്ടിടങ്ങളൊക്കെ പൂട്ടുമെങ്കിലീ-
നമുക്കു ജോലി പോയിടും പിടച്ചിടുന്നു ഹൃത്തടം

വരുന്നതൊക്കെ വന്നു ചേരുമെന്നു ചൊല്ലിയെപ്പൊഴും
പൊരുന്നിരുന്നിടാതെ നാം പഠിച്ച വിദ്യയോർക്കണം
കരത്തിലുള്ള കായ്ഫലത്തെ നോക്കുമോ പിടയ്ക്കവേ
കരഞ്ഞിടുന്നൊരാശ്രയത്തിനായി നിൻ നടയ്ക്കൽ ഞാൻ

ലേശം വൈകി

വൈകിപ്പോയ്- ഇങ്ങു കേറാൻ പലവക കളിയാൽ ബാല്യകാലം കഴിക്കേ
സൗകര്യപ്പെട്ടതില്ലാ പഠന വഴികളിൽപ്പെട്ടു കൗമാര കാലേ
പിന്നെന്നോ വന്നു ചേർന്നൂ കലയുടെ കലയാം ശ്ലോകവാരാശി തീര-
ത്തിന്നും ഞാൻ പിച്ചവെയ്ക്കും ശിശു വഴിയിലഹോ വീഴുകിൽ കാക്കുകമ്മേ

ഇംഗിതം

ഒട്ടേറെക്കാലമായീ സുമുഖി, തവ പദം പിന്തുടർന്നീടുവോൻ ഞാ-
നൊട്ടെന്നിൽ പ്രേമമാര്യേ ചൊരിയണമധുനാ നാളെയെന്നോതിടൊല്ലേ!
മട്ടേതും മാറ്റമില്ലേ? കടമിഴിയിനിയും നീട്ടുവാൻബ്ഭാവമില്ലേ?-
യിട്ടം തെല്ലും വരില്ലേ? വഴി പലതിനിയും വേറെ നോക്കേണ്ടതില്ലേ!!

ഓമൽക്കാഴ്ച

തുള്ളിച്ചാടി നടന്നിടുന്ന വഴിയിൽ ഢിമ്മെന്നു വീണാശു തൻ

കള്ളക്കണ്ണു നിറച്ചിടുന്ന ശിശു വൻ വാവിട്ടു കേഴുന്നു ഹാ!

ഉള്ളം ഞെട്ടിവിറച്ചൊരമ്മയുടനേ മാറോടണച്ചീടവേ-

യള്ളിക്കേറി കിടാവു കൊഞ്ചി, ചിരിയായ് രണ്ടാളുമൊപ്പൊപ്പമായ്!

ഭയം

പിഞ്ചുബാലികയു,മൊത്തകന്യകയു,മമ്പത-ത്തിയൊരു നാരിയും
സഞ്ചരിപ്പു മലയാള നാട്ടിലെ വഴിയ്ക്കു ഭീതിയൊടു നിത്യവും
വഞ്ചനാകുതുകി പൂരുഷന്നുടെഞരമ്പിലെച്ചുടു നിണം ദിനം
തഞ്ചമോടെ ജഘനം തിരഞ്ഞുകൊതിപൂണ്ടു പിന്തുടര കാരണം

കാരുണ്യം

മാർത്താണ്ഡ താപാഗ്നി കടുക്ക മൂലം
താരുണ്യമറ്റു ക്ഷിതിയാർത്തയാകേ
ശ്യാമാഭമാകും കുടമേന്തി നിൽക്കും
മാനത്തു കാറ്റേ തുള വീഴ്‌ത്തു വേഗം

കുടം

മാർത്താണ്ഡ താപാഗ്നി കടുക്ക മൂലം
താരുണ്യമറ്റു ക്ഷിതിയാർത്തയാകേ
ശ്യാമാഭമാകും കുടമേന്തി നിൽക്കും
മാനത്തു കാറ്റേ തുള വീഴ്‌ത്തു വേഗം