സാന്ധ്യവാനം

വിശ്വമാനവവിശപ്പുതീർത്തിടു-

ന്നക്ഷയക്കലവുമേന്തിയംബരം

പശ്ചിമാഴിയിലുരച്ചുമോറിടും

നേരമന്തിയൊളിയിട്ടുവാനിലായ്

ദിഗംബരം

നീലവിൺ തുകിലു തന്നിലായിരം

വർണ്ണചിത്രനിര തീർത്തുസന്ധ്യയാൾ

നാണമേറിമറയത്തുനിന്നരാ-

ക്കുഞ്ഞിനുള്ളപുതുചേലതുന്നിനാൻ

മിഥുൻ മണ്ണൂർ-ആര്യമാർക്ക്

രംഗഭൂമികയൊരുങ്ങി വിപ്രനും

ഭംഗിയോലുമൊരു വേളി കൂടെയും

സംഗമീവിധമിയന്നു വാഴുവാൻ

സംഗമേശനരുളട്ടെ മംഗളം

രാമചരിതം

രാമചന്ദ്രനിടയുന്നു പിന്നെയും

ജീവനൊന്നു പൊലിയുന്നു കഷ്ടമേ

ആനയാണതൊരു കാട്ടുജീവിയാ-

ണെന്നുബോധമുണരും ജനത്തിനും


എന്നാലും രാമനല്ലേ പരമിവിടെവിശേഷിച്ചുമെ ത്തേണ്ടതല്ലേ

വന്നാലും നമ്മളില്ലേ വലിയവടിമുനക്കുന്തമെ ല്ലാതുമില്ലേ

ഒന്നാമൻ കേമനല്ലേ മദസമയമതും തീർന്നമട്ടല്ലെയെന്നാ-

ലെന്നാലും പേടിയല്ലേ കഥപലതറിയാം വേണ്ടവേണ്ടെന്റെ പൊന്നേ


വരത്തനെന്നാകിലുമിത്രമാത്രം

പെരുത്ത'ഫാൻസു'ള്ള ഗജം ചുരുക്കം

ധരിക്കനീ,യാനയിടഞ്ഞു പോയാ-

ലൊരിക്കലും കുറ്റമതിന്റെയല്ലാ


കുറുമ്പസഹ്യം മിഴിതച്ചുടച്ച-

ക്കുറുമ്പുതീർക്കാനിഹനീചവർഗ്ഗം

പൊറാഞ്ഞു പൊള്ളിച്ചു ശരീരമൊന്നും

പൊറുത്തിടാ കർമ്മ ഫലം ലഭിയ്ക്കും

ഗുരുഭക്തി

ഉമയ്ക്കു പാതി ദേഹമേകിയിന്ദുലേഖചൂടിയും

വരാംബുവാഴുമജ്ജടയ്ക്കു നാഗമാലചാർത്തിയും

ലലാടനേത്രവും ഗരംതടഞ്ഞനീലകണ്ഠവും

ധരിച്ചുവാണിടും മഹേശ പാഹിമാം സദാ ഗുരോ

വിവാഹ മംഗള പത്രം (നീരജ് അക്കൂരം)

ശ്രീപതിയ്ക്കു രമ,സീത രാമനും

ശ്രീനിറയ്ക്കുമതുപോലെ തോഴനിൻ

ശിഷ്ടജീവിതമലങ്കരിയ്ക്കുവാ-

നിഷ്ടതോഴിവരുമിങ്ങുനിശ്ചയം


വൃഷ്ണിനന്ദവനികയ്ക്കുചേർത്തു ഹാ

തൃഷ്ണ രാസലയകേളിയാൽ ദ്രുതം

കൃഷ്ണയൊത്തു തവജീവനും പരം

വിഷ്ണുലോകസുഖമൊക്കെനേടിടും


നിന്നെനീയറിയുമെങ്കിലും സഖേ

തന്നിലൂടെയപരന്റെയിച്ഛയും

ഇന്നമട്ടുവരുമെന്നുകാണുവാ-

നിന്നുതൊട്ടുകഴിയട്ടെ സന്തതം


പണ്ടുനിങ്ങളിരുമെയ്യു,മാനസം

രണ്ടു പക്ഷെ,യിനിയേകപാന്ഥരായ്

നീണ്ടഭാഗ്യഗുണപുഷ്ടിയോടെയി-

ങ്ങാണ്ടുനൂറുകഴിയേണമഞ്ജസാ


പാതിമെയ്യതുപകുത്തുദേവിതൻ

പാതിചേർത്ത ഭഗവദ് കൃപാരസം

പ്രീതിയോടെയിനി നിങ്ങളെസ്സദാ

കാത്തിടട്ടെഭുവി മംഗളം സഖേ

സർപ്പദംശം

ഏഴാംനാളിങ്ങു കാലം വിഷഫണസഹിതം
വന്നുചീറ്റുന്നനേരം

വാഴുന്നോരൊക്കെവീഴും പഴകിയകഥനം വിശ്വസിക്കാൻ പ്രയാസം

പോഴൻ ഞാനോർത്തു പക്ഷേ സമയമണയവേ കൊത്തുകിട്ടുന്നൊടുക്കം

കേഴുന്നൂ ഭീതിമൂലം മൃതിനടുവിലലം
പ്രാണരക്ഷാർത്ഥമീ ഞാൻ

തുടി

ത്രിനയനം മുറിയമ്പിളിയേന്തിടും

ജട ഭുജംഗവിഭൂഷിതമേനിയും

വിഷമെഴുംഗളമീവിധമോർക്കവേ

മമമനം തുടികൊട്ടിയുണർന്നിതേ

മുന

ഭള്ളാൽ നീ ചൊന്ന വാക്കിനാൽ

പൊള്ളുന്നുണ്ടെന്റെ നെഞ്ചകം

ഉള്ളിലുണ്ടാകുമാക്കനൽ

കൊള്ളി വെക്കുന്ന നാൾ വരേ

തുപ്പേട്ടന് പ്രണാമം

ചിതയൊരുങ്ങി,മഹാത്മനു പോകുവാ-

നിതിനിനച്ചു ജനം കരയും വിധൗ

പുതിയ നാടകശീലു കിലുക്കി ചെ-

ങ്കതിരെഴും ദിവിപൂകി സനാതനൻ

പ്രതിസന്ധി

എന്നിലില്ല കഴിവൊട്ടുമേയിവിടെയിന്നു കാവ്യമെഴുതീടുവാ-

നെന്നുമോർത്തുവിലപിച്ചുകൊണ്ടു മരുവുന്നു ഞാനുമതി ബാലിശം

വന്നുചിന്ത പലതുംമറഞ്ഞു ഹൃദികൂടി സങ്കടമതെങ്കിലും

തോന്നിയെന്തിനുകുലുങ്ങണം വരണമട്ടു
വാക്കുവരുമങ്ങുപോം