വർഷങ്ങൾ പോയതറിയാതെ

 

കരഞ്ഞുകൊണ്ടണഞ്ഞു ഭൂവിലന്നുരാത്രി പൈതലാൾ,

ചിരിച്ചു നീ വരുന്നതോർത്തു കാത്തു നിന്ന മാനസം

തിരിഞ്ഞുനോക്കിടുമ്പൊളൊക്കെ-

യിന്നലെക്കഴിഞ്ഞപോ-

ലിരിപ്പു,രണ്ടുകൊല്ലമെത്രവേഗമെങ്ങു

പോയഹോ..

വിജയസ്തവം

മതിനിറയുമുരുജഡതയകലെമറവാനാ-

യതിവിനയമമലപദചരണയുഗമെന്നും

നതി,യടിയരിനിയരുതു മടി,യിരുളകറ്റാൻ

സിതകമലദളമമരുമുരുവരദവാണി

ഡബിൾ ഹാപ്പി

ആപ്പിതാ വന്നുപോയാര്‍ത്തിടാം,വാങ്ങിടാം

കുപ്പിയ്ക്കു വേണ്ടിനിക്കാത്തുനിൽക്കേണ്ട ഹാ

കുപ്പിതൻ കപ്പമാണാശ്രയം കാശിനി-

ങ്ങാപ്പിലായ് പോയ സർക്കാരുമേ ഹാപ്പിയായ്

ശങ്ക

സൂപമതിലുള്ള ബഹുസൂപ,മതിലേക്കായ്‌

കാപലതുചേർത്തു പലമട്ടുസഖി തീർക്കും

സൂപമതിനുള്ള രുചിചൊല്ലുവതിനിങ്ങായ്

ഭൂപതിയുമൊട്ടിട കുഴങ്ങുവതു കാണാം


സൂപം1: പാത്രം 2: വെന്ത പരിപ്പ് 3: കറി

സമസ്യ

ജീവിതം പുതു സമസ്യ നിത്യവും

കാവ്യഭാവന വളർത്തിടാമതിൽ

വൃത്തമേതുമതിനുത്തമം വരും

വൃത്തഭംഗമൊഴിവാക്കി നീങ്ങിയാൽ

കളിയല്ല, കാര്യം

കളിയാക്കുകയെന്നതേ ചിലർ-

ക്കളവറ്റുള്ള സുഖ പ്രദായകം

എളുതില്ല മനസ്സിലാക്കുവാൻ

കളിയാക്കപ്പെടുമാളിനുൾതടം


ഒരുവട്ടമതേ തമാശ പി-

ന്നൊരുവട്ടം, ശരി പോട്ടെ, വിട്ടിടാം

സ്ഥിരമായ് പറയുമ്പൊഴോ രസം

വിരസം,താ,നുടനേ നിറുത്തണം


കളിയാക്കുകെളുപ്പമാ,ണതിൽ

പുളകം കൊള്ളുകയത്രകഷ്ടമേ!

വളരുന്നു നിരാശ, കൂടുതൽ

കളിചൊല്ലേ,ണ്ടതു കാര്യമായിടും

ആപ്പ്

പ്രതിരോധഗുണം വളരാനുതകും

പ്രതി, വൈദ്യഗണം പണിചെയ്യുകയാം

പതിവായിനി കാശധികം ചിലവാ-

ണതു മദ്യമൊഴുക്കിയൊരുക്കിടണം


പലപേരുകളിട്ടു,നിറച്ചുടനേ

വിലകൂട്ടുക,വില്പനശാലകളിൽ

പലനാളുകളായി മുടങ്ങിയതിൻ

ചില ചില്ലറദോഷമൊഴിഞ്ഞുവരും


വിളിയന്ത്രമതിൽ പുതുമോടിനിറ-

ച്ചൊളിമിന്നുമൊരാപ്പു കയറ്റിവിടാം

തളരാതെ,വരിയ്ക്കുവിയർപ്പൊഴുകാ,-

തുളവാം മദിരാശ ശമിച്ചിടുവാൻ

നവലോകം

"എങ്ങോട്ടാണീ പ്രയാണം?" "കടവരെ, അരിയും

മറ്റുമേ വാങ്ങുവാനായ്"

"എന്നാൽ മാസ്‌ക്കൊന്നു കെട്ടൂ", "ചെറിയൊരു

തുണിയും കൈയിലില്ലാത്തവൻ  ഞാൻ"

"എന്നാൽ തൻ ഐഡി കാട്ടൂ", "നിജമതു

പറയാം വിട്ടുപോയിങ്ങെടുക്കാൻ"

"എന്നാൽ പോകേണ്ട, ഠാണാവണയുക,

വെറുതേ പട്ടണം ചുറ്റിടേണ്ട!"

ബോധ ദ്യുതി

ഉത്തുംഗവെള്ളിമല മുത്തും പദം

വടിവിലെത്തും മനസ്സിലഴലിൻ

കുത്തും, പ്രലോഭന വിപത്തും കുറഞ്ഞു

സുഖമെത്തും നിരാശയകലും

എത്തും പ്രബോധരവി, കത്തും തെളിഞ്ഞു

ഹൃദിമെത്തും പ്രകാശ,മതിനാൽ

തത്തും മദാന്ധതകെടുത്തുന്മിഷദ്യുതി

പരത്തും ശിവൻ ശിവകരൻ

ലാലേട്ടാ!

നാട്യത്തിലുത്തുംഗ ഹിമാദ്രി,ശേഷം

നാട്യങ്ങളില്ലാത്ത മനുഷ്യനായും

കൂടുന്ന സൗഖ്യത്തൊടു നൂറു വർഷം

കൂടട്ടെ, ലാലേട്ടനു മംഗളങ്ങൾ

നിദ്ര നീക്കൂ

മോഹാതിരേക മന മാഹാ രമിപ്പു ഭുവി

ദേഹാഭിമാനമതിയാ-

യാഹാരവും കനകമാം ഹാരവും ഘനകുചാ

ഹാര്യരാവുകളുമായ്

ഹാ ഹാ നടിപ്പു നര,നീഹാസ്യ നാട്യ,മിഹ

ദാഹാർത്തി വിട്ടകലുവാൻ

സാഹായ്യമാവതിനു നീഹാരശൈലസുത

മോഹാധി നീക്കുക ജവാൽ

ആറുവഴി

ചേറായചിന്തകളിലാറാടിചിത്തകൃമി,

നാറാൻ തുടങ്ങിയകമേ

മാറാതെവയ്യ, മതിമാറാപ്പുമേന്തിയിനി,

യേറാനുമില്ലൊരിടവും

നൂറായിരം വഴിയൊ,രാറായി മാറി,

യതി,ലാറാടുവാനടിയനിൽ

കൂറാളണം തലയിലാറായദേവ!

കഴിയാറായിടും വരെയിനി!!

ഇങ്ങനെ പോയാൽ

മാരാരേ! കൊട്ടൊഴിഞ്ഞോ, പ്രിയതമ
തനയക്കൂട്ടവും പഷ്ണിയായോ

പൂരക്കാലം വരെയ്ക്കും ചിലവിനുവകയായ്
വല്ലതും കൈയിലുണ്ടോ

ആരാനാരാധകന്മാ, രൊരുപിടിമലരോ
നേദ്യമോ നൽകലുണ്ടോ

തീരാതെക്കണ്ട കാലക്കെടുതി പൊറുതി
മുട്ടിച്ചു യാചിക്കുമോ നീ!!

പഠനം

മാറ്റം വന്നുതുടങ്ങിവിദ്യ പകരും രീതിയ്ക്കു,
വിദ്യാർത്ഥികൾ-

ക്കേറ്റം പിന്തുണനൽകുവാനിനിവരും
സാങ്കല്പികാദ്ധ്യാപകർ

കാറ്റോ കാർമുകിലോ പെരുംപ്രളയമോ
രോഗങ്ങളോ തീണ്ടി,ടാ-

തൂറ്റത്തോടവരെന്നുമേ പലതരം പാഠം
പഠിപ്പിച്ചിടും

കണ്ടുപിടിക്കാം

ശീവൊള്ളി രചിച്ചതെന്ന് കരുതുന്ന ഒരു പ്രഹേളിക താഴെ കൊടുക്കുന്നു..

പ്രഹേളിക

മുന്നം മൂന്നക്ഷരം ചൊല്ലണമതൊരുമൃഗ -
ത്തിൻ്റെ പേരായ് വരേണം

പിന്നീടപ്പേരിലൊന്നാം ലിപിവിടുകിലതായ്
ത്തീരുമൂർമ്മിക്കെഴും പേർ

പിന്നെച്ചാടാൻതുടങ്ങുക്രിയയുടെയൊരു പേ-
രാകുമന്ത്യാക്ഷരം വി-

ട്ടെന്നാൽ മദ്ധ്യംവെടിഞ്ഞാലതു ചുമയുടെ പേ-
രേതുവാക്കാണതാവോ!

*ഇതിന് ഉത്തരം എഴുതാൻ ഉള്ള എന്റെ ശ്രമം..*

മുന്നം ചൊല്ലേണ്ട വാക്കാമൃഗമതിനൊരു
പേരാണു മൂന്നക്ഷരംതാ-

നൊന്നാംവർണ്ണം കളഞ്ഞാലിരുലിപി തിരയാ,
മൂർമ്മിയെന്നർത്ഥമായി

എന്നാലന്ത്യംവെടിഞ്ഞാൽ കുതി,യതിനു സമം
ചാടുവാനോങ്ങൽ, മദ്ധ്യം

ചൊന്നില്ലെന്നാലുരയ്ക്കാം കുര,യിതി
കുതിരശ്ശബ്ദമാണുത്തരം കേൾ

അശുദ്ധം

തൊട്ടുതീണ്ടിയശുദ്ധമായ ശരീരമെ
ങ്കിലതിന്നക-

ത്തൊട്ടസംഖ്യമണുക്കളെത്തിടുമെന്നു
കണ്ടജനം സദാ

കെട്ടിമൂടിമുഖം നമുക്കിനിയെന്ത്!,
പക്ഷെയകത്തളം

കെട്ടുപോവുകമൂല,മില്ല നരന്നു
രക്ഷയിഹത്തിലായ്!!

രണ്ടായാലും...

പറയാനരുതാത്തകാര്യമേ

പറയൂ നാട്ടിലെ ദുർജ്ജനം സദാ

പറയേണ്ടവസജ്ജനങ്ങളും

പറയില്ലെന്നതു കഷ്ടമാണഹോ

പറയില്ല

പറ, നാഴികളെത്രചേരണം

പറയൊന്നിങ്ങുനിറയ്ക്കുവാൻ, പ്രഭോ

പറയാനറിയില്ല, കാരണം

പറയില്ലെ,ന്നതു കഷ്ടമാണഹോ!

അമ്മ

ഉള്ളിന്നുള്ളിലുറഞ്ഞിടുന്ന മധുരം
കോരിത്തരുന്നമ്മത-

ന്നുള്ളംകൈയ്യിലുറങ്ങിടുന്ന ശിശുതാ,
നാമക്കളെക്കാലവും

പൊള്ളും ജീവിതസാഗരത്തിരകളിൽ ത്തട്ടിത്തെറിക്കാതെ നാം

തുള്ളിച്ചാടിനടന്നിടാനുരുകിടും
മാതാവിനെക്കൈതൊഴാം

ജന്മം

കളിച്ചു മുന്നേറിയ ബാല്യ,മേറെ-

ച്ചൊടിച്ച കൗമാരമതൊക്കെയുംപോയ്‌

തുടിച്ചിടും യൗവനമിന്നു ശേഷം

കിതച്ച വാർദ്ധക്യമിതത്രെ ജന്മം

നന്മ

ദാഹാർത്തരാകും ജനതയ്ക്കു നീരും

ദേഹത്തിലേന്തീട്ടു വരുന്നു മേഘം

ഇതില്പരം നന്മ ചൊരിഞ്ഞു നൽകു-

ന്നൊരാളുമേയില്ലതു നിശ്ചയം താൻ

ആല

ലോഹം പഴുപ്പിച്ചടിനൽകിയെന്നാ-

ലൂഹിച്ചരൂപം നിലനിൽക്കുമെന്നും

ചിത്തം തപിപ്പിച്ചടിയേകിയീശൻ

മോഹിച്ചപോൽ നമ്മളെ മാറ്റിടുന്നൂ

കാന്താ... ഞാൻ...

ചെന്തീചിന്തും നിടിലമിഴിയാൽ കാമനെ
ച്ചുട്ടയാളി-

ന്നന്തം കാണാത്തിരുജടയിലഗ്ഗംഗയെ
പ്പോറ്റുമെന്നായ്

എന്താകും മത് സ്ഥിതി, ഹൃദിഭയം
ശൈലജയ്ക്കേറി പാരം

വെന്തീടുന്നൂ കഠിനരുജയാൽ, സ്ഫീതമായ് ശ്രീ
തിളങ്ങി

ഭാരത ശ്രീ

ധൃത്യുത്സാഹം സഹനമുറയും കർമ്മ
മാർഗ്ഗങ്ങളാക്കി

സ്വാതന്ത്ര്യത്തിന്നരുണകിരണം ബാപ്പു രാജ്യത്തിനേകി

അത്യാചാരൻ മതമദഭരം
തോക്കുതിർക്കെക്കഴിഞ്ഞൂ

സത്യാകാരൻ കഠിനരുജയാൽ, സ്ഫീതമായ് ശ്രീ തിളങ്ങി

കേരളമോഡൽ

ആണ്ടോടാണ്ടാപ്രളയദുരിതം കണ്ടു ശീലിച്ച നേര-

ത്തു,ണ്ടല്ലേറ്റാ,നിതുവഴിവരും നിപ്പ, തോറ്റില്ല നമ്മൾ

കണ്ടാവൂ കോവിദകണിക തൻ പ്രാഭവം നാടി,തെന്നാ-
 
ലുണ്ടോമാറ്റം കഠിനരുജയാൽ, സ്ഫീതമായ് ശ്രീ തിളങ്ങി

എന്നിട്ടും!

കാലനൂർക്കുള്ള ടിക്കറ്റും

കാലേ കൈയിലെടുത്തു നാം

കാലം തീർക്കുന്നുവെന്നാലും

കോലംകെട്ടാൻ മടിച്ചിടാ!


ചില്വാനം കുന്നു കൂടണം

ചൊല്ലേറും കോട്ടകെട്ടണം

ചെല്ലുമ്പോളാളു കൂടണം

ചൊല്ലാനും നാലുപേർ വേണം


എന്നിട്ടും തൃപ്തി പോരാതെ-

വന്നീട്ടിന്നാടുതോറും തൻ

ഔന്നത്യം പാടുവാൻ വേണ്ടും

കന്നത്തം കാട്ടുമീ നരൻ


ഇപ്രകാരം കഴിഞ്ഞാലും

സുപ്രസിദ്ധൻ വിളിക്കുമ്പോൾ

ക്ഷിപ്രമോടുന്നു നാമെല്ലാ-

മിപ്രപഞ്ചത്തിൽ നിന്നു ഹാ!


വെട്ടിനേടിയതും ദാനം

കിട്ടിബോധിച്ചതും പിന്നെ

കട്ടെടുത്തതുമീ നാട്ടിൽ

വിട്ടുപോകുന്നു മാനവൻ


മാറ്റമില്ലാത്തയിക്കഥ-

യ്ക്കറ്റം കാണാൻ പ്രയാസമേ

ഊറ്റം കൂടുമ്പോളോർക്കുവാ-

നേറ്റം നന്നു പറഞ്ഞിടാം

ബന്ധു

ഈതി ധരയാകെ നിറയുന്നു ജനമേറ്റം

ഭീതിയൊടു വീടിനകമേറിമരുവുന്നൂ

ജ്ഞാതിയിനിയാരിവിടെ, ഭൂരികൃപയോലും

പാതിനരപാതിമൃഗപാദമവലംബം

ബോറടി

ഉന്തുവണ്ടിയുരുട്ടി കായ്കറിവില്പനാർത്ഥ-
മടുത്തിടും

ചെന്തമിഴ്ച്ചുവകേട്ടു പാത്രമെടുത്തിറങ്ങിയ വേളയെൻ

ചിന്തപോയി, മുഷിച്ചിൽമാറ്റിയെടുക്കുവാനൊരുപായമായ്

ഹന്ത! ചെക്കനു കൈമടക്കു കൊടുത്തു വണ്ടിയെടുത്തുഞാൻ

ഉറക്കമുണരണം

സാന്ദ്രാനന്ദം നുണഞ്ഞാശിശു മിഴിപതിയെ-
പ്പൂട്ടി നന്നായുറങ്ങാൻ

വേണ്ടുംവണ്ണം സഹായം ഹരികഥദിനവും കേട്ടുസാധിക്കുമെന്നാൽ

ബോധം നന്നായുറച്ചാഹൃദയമലരകം
ശ്രീലകം തന്നെയാവും

നൂനം, പൈതൽക്കുഭാഗ്യം ഗുരുപവനപുരാ- ധീശ്വരൻ നൽകിടട്ടേ

ഓർമ്മവേണം

പുതിയ ഭൂമിക തേടിവരും ധ്വര-

ക്കൊതിയരോടടരാടിയ ഭാരതം

നതിയൊടെത്തൊഴുതോർക്കണമെപ്പൊഴും

ചതിയിൽ വീണു മരിച്ചവർ തന്മുഖം




 

ചതി

അതിരു കൊട്ടിയടച്ചയലത്തുകാ-

രതിമിടുക്കുതുടർന്നു കളിക്കവേ

പതിവുകാഴ്ചയിലെത്തി വഴിയ്ക്കുവൻ

ചതിയിൽവീണു മരിച്ചവർ തന്മുഖം

പൂരം

കടലലകളിളകി വരുവതിനു സമമാൾക്കാ-

രിടവഴികൾ കയറി കരി, തിമില, തിറ, തെയ്യം

നട നടന നിനദമൊടു കതിന വെടി കേട്ടാ-

ലുടനെഹൃദിനിറയെ തകതകതകിട ധീം ധീം


സ്വനപുടവുമിരുകരവുമതിസരസമൊന്നാ-

യനുനിമിഷമൊഴുകിയിടയിരികിട, സഹർഷം

കനവുകളിലധികമധു പകരുമൊരു പൂരം

ജനവിരലിൽ നിറയെ തകതകതകിട ധീം ധീം


നടമുറുകി,യടവിലടി തിമിലയിടയുന്നൂ

വെടിപുകയിലണിഗഗന പഥവുമെരിയുന്നൂ

ഉടയുമിഹ മമ മനവുമുരുകി മിഴിനീരാ-

ലൊടുവിലടിപതറി, വിട തകതകിട ധീം ധീം

ഇന്നത്തെ മഴ

വിരവിലിഹ കരിമുകിലു നിരയിടുകയായീ

തരുമതിനി ജലകണിക ജനതതികൊതിക്കേ

ഉരുപവന കരലതിക മുകിലലവരിഞ്ഞ-

ങ്ങെരിയുമിനകരനിരയിലെറിയുവതിനെത്തീ

ഗോ കൊറോണ ഗോ

പൊരുന്നിരിക്കും പിടയെന്ന മട്ടി-

ങ്ങിരിപ്പു മർത്യൻ ഭയമോടു കൂട്ടിൽ

വിരിഞ്ഞിറങ്ങാനിനിയെത്രകാത്തി-

ങ്ങിരിക്കണം നെഞ്ചു പിടച്ചിടുന്നൂ


സമൂഹമൊന്നാകെയടയ്ക്കു വേഗം

സമൂലമിക്കോവിഡുവിട്ടു പോകും

നിമേഷമിക്കാര്യമുറച്ചുരച്ചേ

സമാശ്വസിക്കുന്നു ജനങ്ങളെന്നും


ഗതാഗതം,കച്ചവടം,കടം, ദുർ-

ഗതിയ്ക്കുപായം നഹി ശൂന്യമെല്ലാം

ചതിച്ചു നീ ഞങ്ങളെരിഞ്ഞു തീരാ-

നിതിൽപരം കഷ്ടതയില്ല വേറെ


പുറത്തിറങ്ങാതെയിരിപ്പവോർക്കി-

ങ്ങറപ്പു തോന്നുന്നു കൊറോണെ നിന്നെ

ഉറക്കമൂണെന്നിവവിട്ടു കട്ട-

പ്പുറത്തു കേറില്ല നിനയ്ക്ക വേണ്ടാ


പതുങ്ങിനിൽക്കേണ്ട തുരത്തിടും നിൻ

പതിഞ്ഞതാളത്തയുമുഗ്രരൂപിൻ

പ്രതിജ്ഞ ചൊല്ലുന്നിനിയിങ്ങുവന്നാ-

ലൊതുക്കിടും സൂചിമുനമ്പിലായി


അധികമാധികളിങ്ങുപരത്തിടാൻ

തുനിയുമോയിനിയും രുജരാജ നീ

അഴലുമാഴലുമായിനികൂടുകി-

ല്ലിനി,യമം നിയമംവഴിനോക്കിടും

പുറംകാഴ്ച

പൂത്താങ്കീരിക,ളാനറാഞ്ചി,മയിലിൻ-
കൂട്ടം, പനംകാക്ക, പൂ-

ന്തത്തമ്മ,ക്കുയി,ലാറ്റ,സൂചിമുഖിയും
പ്രാവും മരംകൊത്തിയും

തത്തി,ക്കൊത്തി,നടന്നിടുന്നു, മധുരം-
പാടുന്നു, കേട്ടിങ്ങു ഞാ-

നാത്താനന്ദമിരിയ്ക്കയാം,പരമമാം
ധ്യാനംതരില്ലീസുഖം

അടുക്കളത്തോട്ടം

മത്ത, ചീര, ചുരയ്ക്ക, വെള്ളരി, വെണ്ട, പാവലു, കുമ്പളം,

കൊത്തമല്ലി, മുരിങ്ങ, കോവലു, പീച്ചിലെന്നവയൊക്കെയും

വിത്തു പാകി, വളംകൊടുത്തു, മുളച്ചുപൊന്തിവരുന്നതും

കാത്തുകൊണ്ടുകഴിച്ചിടുന്ന ദിനങ്ങളെത്ര
മനോഹരം..!!

കണ്ണീർ

ചന്ദ്രാദിത്യസമം വിളങ്ങുമിരുപേ,
രിങ്ങെത്തുമാവാർത്ത,ത-

ന്നെന്തുത്സാഹമതിങ്കലെത്രയഴകിൻ വർണ്ണങ്ങൾ തീർത്തൂ മനം

അന്തിക്കാറ്റിലണഞ്ഞുദീപ,മകതാ,
രൊപ്പംപിടഞ്ഞൂ വിധി-

യ്ക്കെന്തേയിത്രവിരോധഭാവ, മരുതേ
താങ്ങില്ല തായാശ്രു നീ

ബലം

ണിം ണിം മണിസ്വരമുയർന്നുണരുന്നൊരുണ്ണി-

ക്കണ്ണൻ കടാക്ഷമിഴികൊണ്ടുഴിയും ക്ഷണത്തിൽ

കാണാത്ത ദുഃഖനിരനീങ്ങുവതല്ലെ പിന്നെ-

യാണോകൊറോണ! ഹരിനാമമുരയ്ക്ക നാവേ

നഷ്ടസ്വർഗം

എട്ടുമാസം കൊതിച്ചൊന്നാ-

യൊട്ടുദൂരം നടന്നതും

ഒട്ടും കാരുണ്യമില്ലാതേ

കട്ടെടുക്കുന്നു ദുർവിധി


കാത്തിരിപ്പിന്റെ നാൾകഴി-

ഞ്ഞാത്തമോദേന പാടുവാൻ

കോർത്തതാരാട്ടുപാട്ടെല്ലാ-

മാർത്തനാദത്തിലാഴ്ന്നു പോയ്‌


ഒന്നുചേർന്ന ദിനം തൊട്ട-

ങ്ങൊന്നായ്ക്കാണും കിനാക്കളിൽ

നിന്നുമാലേയ സൗരഭ്യം

തന്നെത്താനെയകന്നുപോയ്


എങ്ങനെയാശ്വസിപ്പിക്കാൻ

കിങ്ങിണിപ്പെണ്ണിനെപ്പരം

തിങ്ങിടും നോവിനാലുള്ളം

വിങ്ങിനീറുന്ന വേളയിൽ


അമ്മയാകേണ്ടവൾ മുന്നിൽ

ജന്മമറ്റതു പോലവേ

ആ മനസ്സു തണുപ്പിക്കാൻ

ജന്മമെത്രയെടുക്കണം


കണ്ണേ! മുന്നോട്ടു പോയീടാൻ

കണ്ണുനീർച്ചാലു താണ്ടണം

മണ്ണായ്ച്ചേർക്കേണ്ടതാം വിത്തു

മണ്ണിൽ നട്ടു വളർത്തണം


കൂടും ദുഃഖം ശമിപ്പിക്കാ-

നോടും കാലത്തിനൊക്കയാൽ

കേടറ്റിങ്ങു തളിർക്കുമി-

ക്കാടും പുഷ്പങ്ങളാലെടോ


പാടും താരാട്ടൊരുണ്ണിക്കാ-

യാടും പാട്ടൊത്തു നിൻ മനം

വാടാതെക്കണ്ടുനിൽക്കൂ നിൻ

കൂടെത്തന്നുണ്ടു ലോകവും

ആരാ?

ആരാതാനെന്നു തീർത്തും പറയണ,മൊരുവൻ
പേരുചൊല്ലിക്കൊടുക്കും

പോരെന്നാലോ വിലാസം നിരവധിയറിയൽ രേഖ,യെന്നാലുമൊന്നും

പോരാതാകുന്നഘട്ടം തലപുകയുമിനി-
ക്കാട്ടുവാനൊന്നുമില്ലെ-

ന്നാരായുന്നോനൊടോതും തൊഴുകരമൊടു
തൻ വേരുതേടാനൊരുങ്ങും

മാറ്റം

രോഗംമെല്ലെയൊടുങ്ങാറായീ

അന്തിച്ചർച്ചകൾ ഭാവം മാറീ

ഇന്നലെ വരെയും രാഷ്ട്രീയത്തിൻ

വാദമുഖങ്ങൾ കേട്ടില്ലിന്നോ

തിരുകിക്കേറ്റുന്നുണ്ടേ പലവിധ

ഭിന്നിപ്പിൻ സ്വരമെത്ര വിചിത്രം

തമ്മിൽത്തല്ലും വാക്കേറ്റങ്ങളു-

മത്രേ റേറ്റിംഗ് നിർണ്ണയ സൂചികൾ

തങ്ങടെ ചാനൽ മുങ്ങിപ്പോകാ-

തെങ്ങും പാറി നടക്കാൻ വേണ്ടും

പണികളെടുക്കും നിങ്ങൾ തീർക്കും

കെണിയിൽ വീണു വലഞ്ഞൂ ജനവും

മർത്യർക്കൊനിക്കാനായ് വീണ്ടും

രോഗം വേണോ പ്രളയം വരണോ

കഷ്ടം നാടിൻ ദുഃസ്ഥിതിയോർത്താൽ

നമ്മുടെ യോഗം അല്ലാതെന്താ

അലമാര: ആസ്വാദനക്കുറിപ്പ്

അലമാര തുറക്കവേ ഭവാ-

നലയായെത്തുമനേകമോർമ്മകൾ

അലമിന്നു മിഴിയ്ക്കുനൽകിനീ-

രല,ദേഹംവിറകൊണ്ടു നോവിനാൽ

പ്രതീക്ഷ

മതം ജാതി ബന്ധം പ്രതാപം പ്രവാസം

സിതം ശ്യാമവർണ്ണം വികാരം വിചാരം

ഇതെല്ലാം കൊറോണയ്ക്കു കീഴ്പ്പെട്ടു,പക്ഷെ

പ്രതീക്ഷയ്ക്കു കോട്ടം ഭവിയ്ക്കാതെ നീങ്ങാം

നവോഢ

ക്ഷിതിക്കാത്തഭാഗ്യം നിറയ്ക്കുന്നമേട-

പ്പുതുപ്പെൺ വലംകാലുവെച്ചിങ്ങു കേറാൻ

അതുല്യ പ്രഭാപൂരദീപം കൊളുത്താം

പ്രതീക്ഷയ്ക്കുകോട്ടം ഭവിക്കാതെ നീങ്ങാം

വിഷുഫലം

വിഷുഫലം പറയുന്നതു കേട്ടുവോ

വിഷമഘട്ടമൊഴിഞ്ഞു സുഖംവരാൻ

ഇനിയുമിത്തിരിനാളു പുരയ്ക്കക-

ത്തിനിമയോടെയിരിക്കണമത്രെ നാം

ഹിമഗിരി ദർശനം

അടിയുമാപൊടിനീങ്ങിയകന്നവാ-

റടിമുടിയ്ക്കു തെളിഞ്ഞു മഹാമല

തുടരെ മാനുഷശല്യമൊഴിഞ്ഞിടിൽ

പടിപടിയ്ക്കുണരും പ്രകൃതീശ്വരി

ജലന്ധറിൽ അന്തരീക്ഷ മലിനീകരണം ഒഴിഞ്ഞപ്പോൾ ഹിമാലയം തെളിഞ്ഞു കാണാനായി..

വൈരുദ്ധ്യം

ഇല്ലാവാഹനജാഥ,വീഥി വിജനം
നിർമ്മാണ കോലാഹലം

തെല്ലും കേൾക്കുവതില്ല,യില്ല മലിന
ക്കാറ്റും മഹാനാറ്റവും

നല്ലിക്കാലമിതെത്ര ശാന്ത സുഭഗം
ഭൂദേവി സോല്ലാസമോ-

ടല്ലിപ്പുഞ്ചിരിതൂകിടുന്നു നരനോ
ദുഃഖാർത്തനായ് നില്പു ഹാ!

പ്രസ്ഥാനഭക്തി

"വോട്ടല്ലേ നിന്റെ നേതാവിനിഹ വലുത","തേ
നിന്റെയോ?" "നിന്റെയാളോ

കട്ടില്ലേ കാശുമൊത്തം", "ബഹുവിധകളവിൻ കേന്ദ്രമേ നിന്റെയാൾക്കാർ"

"ചുട്ടില്ലേ കൂട്ടുകാരെത്തവസഖ,"രതുനിൻ കൂട്ടരും ചെയ്തതല്ലേ"

പൊട്ടൻമാരിപ്രകാരം ഗമപറയുവതിൻ
പേരു രാഷ്ട്രീയമെന്നായ്!

സോഹം

ദേഹംക്ഷീണിച്ചുവന്നാ,ലടിപതറുകയോ
ചോർന്നിടാ ധൈര്യമാര്യേ

ദേഹംനിൽക്കില്ല സൂക്ഷ്മം മൃതിവരുമിവിടെ- പ്പൂത്തതെല്ലാം നശിക്കും

ദേഹംകണ്ടുള്ള ദുഃഖം സുഖമിവകളയാം തത്വമോരുന്നപോൽ നാം

ദേഹംതാൻവിട്ടു സോഹം തിരയുകയകമെ, ക്കണ്ടുവെന്നാൽജ്ജയിച്ചൂ

ശീതളാദേവി സങ്കല്പം

നാടിന്നേവം കൊറോണാസുരകണികകൾതൻ ദ്രോഹമേറ്റങ്ങുപാരം

വാടിപ്പോകുന്നു, നാട്ടാർ മൃതിഭയമൊടു ഹാ ക്രന്ദനം ചെയ്‌തിടുന്നൂ

കേടാറ്റാനെത്തിടേണം, കരമതിലമൃതും
ചൂലുമായ് ദൈത്യനോലു-

ന്നാടോപംതീർത്തു കാക്കാൻ ഹിമഗിരിതനയേ ശീതളേ കുമ്പിടുന്നേൻ

നാക്ക് പിഴ

"മുടികോതിയൊതുക്കിടാമുമേ

മടികാട്ടേണ്ടിനി നീരിറങ്ങിടും"

ഇടിവാൾമുനവീശി ദേവി,നി-

ന്നിടിവെട്ടേറ്റതു പോലെ ശംഭുവും

സുഖവാസം

അവാച്യമത്യത്ഭുതമത്ര ഹൃദ്യം

ഗൃഹാന്തരേവാസിത കാലഘട്ടം

പുറത്തു പാറാവു,കുറിച്ചു വിട്ടാ-

ലവശ്യവസ്തുക്കളടുക്കലെത്തും

പോകൂ

നിരത്തിലങ്ങിങ്ങു നടന്നു രോഗം

പരത്തിടാനോ? പ്രതിചേർക്കുമെന്നാൽ

കുരച്ചിടേണ്ടാരുമതാണു കാലം

തിരിച്ചുപോകൂ മതിയാക്കി വേഗം

കുഞ്ഞിപ്പെണ്

ചുണ്ടിലെ മായാച്ചിരി നിറഞ്ഞോരുത്സാഹവും

കണ്ടിന്നെൻ നെഞ്ചിന്നുള്ളിൽ വിരിഞ്ഞൂ നൂറു പൂക്കൾ

പാട്ടിന്റെ താളത്തിൽ നീ കയ്യടിച്ചാർക്കുന്നേരം

കൂട്ടിന്നായെത്തീടുന്നു ചരണം നീയോരാതേ

ചിണുങ്ങും നേരമയ്യാ ചുണ്ടുകൾ കൂർപ്പിച്ചു നീ

കുണുങ്ങീട്ടമ്മ തന്റെ മാറിലായ് ചാഞ്ഞു വീഴും

ഇപ്പുരയ്ക്കകത്തളം മുഴുക്കേ നിറയട്ടേ

ചിൽപ്പുമാൻ തന്ന കുഞ്ഞിപ്പെണ്ണിന്റെ വായ്ത്താരികൾ

കാലനും യക്ഷിയും

കാലാലയം ഭൂമിയിലേക്കു മാറ്റി-

സ്ഥാപിച്ച മട്ടാണിഹ കാര്യമോർത്താൽ

പ്രേതങ്ങളെക്കൊണ്ടു നിറഞ്ഞു പിന്നേം

പോകാൻ മടിയ്ക്കുന്നു കൊറോണ യക്ഷി


ഇപ്പോക്ക് പോകുന്നതുകണ്ടു കാര്യം

ഇപ്പോഴടുത്തൊന്നുമുപാധിയാകാ

നിപ്പായിലും മൂത്ത കൊറോണ വന്നി-

ട്ടിപ്പാരിടം കാലനു കാഴ്ച വെച്ചോ

അഭേദം

വിശന്നിരിക്കുന്ന ജനത്തിനുണ്ടോ

കശക്കിടും രോഗഭയങ്ങളെല്ലാം

അശാന്തി കാലത്തു നടന്നു പോകാ-

നാശക്തരല്ലീകഠിനപ്രയത്നർ


രാജധാനിയിലമർന്നിരിക്കിലും

രാജ്യരക്ഷ കഥയായി മാറിയോ!

ഭോജനത്തിനു വകയ്ക്കുവേണ്ടി സം-

പൂജ്യരാം ജനതനാടു തെണ്ടണോ!


സചിവരോതുമുറപ്പുകളൊക്കെയ-

ങ്ങുചിതമായി നടത്തിയെടുക്കുവാൻ

രുചികുറഞ്ഞവരിങ്ങു ഭരിക്കുകിൽ

സചിവനും ഗതിയെന്തിനിയീശ്വരാ!


ഇന്നിക്കണ്ടതു ദില്ലിയിൽ

നാളെക്കേരള നാട്ടിലും

അന്നത്തോളമനന്യമാ-

യില്ലാമറ്റൊരുവ്യാധിയും

പലായനം

കത്തും തൻ വയറോളമില്ല ദുരിതം
മറ്റൊന്നുമീനാട്ടിലെ-

ന്നത്യന്തം വ്യഥയോടെയോർത്തു നഗരം
വിട്ടോടുമാമാനുഷർ

എത്തീയെന്നുവരാം സ്വദേശമഥവാ
പാതിയ്ക്കുവീഴാം, മുഖം

താഴ്ത്താം നാം കരുതേണ്ടപോലെയവരെ- ക്കാക്കാൻ ശ്രമിക്കാത്തതിൽ

കൈവിട്ടുവോ..?

കോടാനുകോടിജനമിങ്ങു കൊറോണ മൂലം

പേടിച്ചു തങ്ങളിലൊതുങ്ങിയൊടുങ്ങിടുന്നൂ

കേടറ്റൊരാളുമിഹയില്ല, തടഞ്ഞിടാനും

പാടാണിതെന്നുവരുമോയിനി ഹന്ത കഷ്ടം.

കോവിദായനം

മൂന്നാഴ്ച തീരുമ്പൊളിറങ്ങി നന്നാ-

യോടേണമിന്നാട്ടിലുടങ്ങുമിങ്ങും

ഇത്ഥം നിരൂപിച്ചു കഴിഞ്ഞു കൂടും

ലോകർക്കു രാമായണവും രസിക്കും

മണിച്ചിത്രപ്പൂട്ട്

അല്ലിയ്ക്കാഭരണം തിരഞ്ഞു കടയിൽ പ്പോകാനൊരുങ്ങുന്ന,ത-

ന്നല്ലിത്താമരയക്ഷിയെത്തടയിടും
ഭർത്താവു പോലിന്നു ഹാ

തെല്ലും ബോധമുദിച്ചിടാത്ത ജനതാ-
വർഗ്ഗത്തിനോടേറ്റിടും

പൊല്ലീസിൻ പണിയെത്രകഷ്ടമവരേ
രക്ഷിക്കുവാനാരഹോ

മന്ത്രം

സമക്ഷമെത്തിനോക്കിടും കൊറോണതൻ കരത്തിനാ-

ലമർന്നുപോയിടാതെ നാം കരുത്തരായിരിക്കു വാൻ

ശ്രമിച്ചിടുന്ന കൂട്ടരോതിടുന്ന മന്ത്രമൊന്നിതാ

"നമുക്കു രക്ഷ വീടുമാത്ര,മില്ല മറ്റുമാർഗ്ഗമേ"

അടച്ചിരിപ്പ്

വാഴേണം മൂന്നു വാരം നിലയനമതിലായ്,
ഭേദമില്ലാർക്കുമെന്ന-

ങ്ങാഴംകൂടുന്ന വാക്യം, ചെവികളിലലയായ് വന്നുവീഴുന്ന നേരം

പോഴത്തം കാട്ടിടാതേ, ക്ഷമയൊടു ഭവനം തന്നിലേ കൂടിടേണം

താഴാം, തീവ്രാണുകാലം, സമരസമൊടു നാ, മൊന്നുചേർന്നിന്നു നിൽക്കിൽ

കുരുക്ക്

ഉറഞ്ഞുതുള്ളി വെട്ടിടാനൊരുങ്ങിയെ ത്തിടുന്നൊരി-

ക്കൊറോണയേ കുരുക്കിടാനൊളിച്ചിരിക്കലത്ര മേൽ

കുറച്ചിലല്ലൊരാളുമേമടിച്ചിടേണ്ടൊളിക്കുവാ-

നുറച്ച മാനസത്തൊടിങ്ങടച്ചിരിക്കയേകരായ്

അണുനാശിനി

ദുശ്ശാഠ്യം വിട്ടിടേണം സ്വസുഖവുമസുഖം
കൂട്ടുമെന്നോർത്തിടേണം

നിശ്ശേഷം നിർത്തിടേണം പലവഴി വെറുതേ- ചെന്നു കേറുന്ന ശീലം

സശ്രദ്ധം വാണിടേണം, നിലയന കവചം
പൂകലാണുത്തമം കേൾ

പ്രശ്നം കൂടാതെ രക്ഷപ്പെടുവതുവരെയും കാക്കണം നമ്മൾ നമ്മെ..

രക്ഷാർത്ഥം

ഭൂലോകത്തിൻവലിപ്പം, ഗരിമനിറയുമാ
ശാസ്ത്രസാങ്കേതികത്വം

തോൽക്കുന്നോയിന്നിതെല്ലാം, പടരുമൊരണുവിൻ ചൂടുകാറ്റേറ്റു കഷ്ടം!

ഇല്ലാതായ് മറ്റുമാർഗ്ഗം, പെടുമരണഭയം
കൂടി മർത്ത്യന്റെ കാര്യം

വല്ലാതായ്, ധർമ്മദേവാ! കരുണയൊടിനി നിൻ ഭൃത്യരെശ്ശാന്തരാക്കൂ!

സ്വയം കരുതൽ

മുറ്റുംഭീതി വിതച്ചു മാനുഷകുലം
മുച്ചൂടെരിയ്ക്കും വിധം

ചുറ്റിച്ചുറ്റിവരും കൊറോണ കണികാ
ജാലങ്ങളിങ്ങെത്തവേ

ചുറ്റിന്നോടി നടന്നിടാതെ,യകലം
പാലിച്ചു നിസ്വാർത്ഥരായ്

മുറ്റത്തെത്തിയ ഭീകരന്റെ പതനം
സമ്പൂർണ്ണമാക്കാം സഖേ!

ഒളിപ്പോര്

മഹാവ്യാധിയാകും കൊറോണയ്ക്കുമുന്നിൽ

മഹാരാജ്യമൊന്നാകെ വീഴാതിരിയ്ക്കാൻ

അഹംഭാവമല്പം മറന്നിട്ടു നമ്മൾ-

ക്കഹസ്സന്തിയോളം മുറിയ്ക്കുള്ളിൽ വാഴാം