എന്നിട്ടും!

കാലനൂർക്കുള്ള ടിക്കറ്റും

കാലേ കൈയിലെടുത്തു നാം

കാലം തീർക്കുന്നുവെന്നാലും

കോലംകെട്ടാൻ മടിച്ചിടാ!


ചില്വാനം കുന്നു കൂടണം

ചൊല്ലേറും കോട്ടകെട്ടണം

ചെല്ലുമ്പോളാളു കൂടണം

ചൊല്ലാനും നാലുപേർ വേണം


എന്നിട്ടും തൃപ്തി പോരാതെ-

വന്നീട്ടിന്നാടുതോറും തൻ

ഔന്നത്യം പാടുവാൻ വേണ്ടും

കന്നത്തം കാട്ടുമീ നരൻ


ഇപ്രകാരം കഴിഞ്ഞാലും

സുപ്രസിദ്ധൻ വിളിക്കുമ്പോൾ

ക്ഷിപ്രമോടുന്നു നാമെല്ലാ-

മിപ്രപഞ്ചത്തിൽ നിന്നു ഹാ!


വെട്ടിനേടിയതും ദാനം

കിട്ടിബോധിച്ചതും പിന്നെ

കട്ടെടുത്തതുമീ നാട്ടിൽ

വിട്ടുപോകുന്നു മാനവൻ


മാറ്റമില്ലാത്തയിക്കഥ-

യ്ക്കറ്റം കാണാൻ പ്രയാസമേ

ഊറ്റം കൂടുമ്പോളോർക്കുവാ-

നേറ്റം നന്നു പറഞ്ഞിടാം