മടക്കം

വരിക ഓമനേ
ഇത്തിരി നേരം എന്‍റെ അരികത്തിരിക്കുക
ഇനിയൊട്ടുസമയമില്ലല്ലോ പോകാന്‍
അതിനാല്‍ അരികെ തന്നിരിക്കുക
ഒന്ന് പൊട്ടിക്കരയാം ,
വേണമെങ്കില്‍ ,ഒന്ന് ചിരിക്കുകയുമാവാം
ഇനിയൊരിക്കലും എന്‍ ചാരത്തിരുന്ന്
ഇതൊന്നും പറ്റുകയില്ലലോ
ആ പഞ്ഞി ഒന്ന് ശരിക്കും വയ്ക്കൂ
പ്രാണികള്‍ കയറി ശല്യം ചെയുന്നു
ഇപ്പോഴും സ്വസ്ഥത ഇല്ലാച്ചാല്‍ ...
പുതു വസ്ത്രം നന്നായി ഉടുപ്പിക്കു
കാണാന്‍ ആരുമില്ലെങ്കിലും
ആ നാളികേരത്തിലെ തിരി ഒന്ന് നീട്ടുക
പ്രകാശ പൂരിതമാവട്ടെ അന്ത്യയാത്ര
ഒന്നോര്‍ത്താല്‍ ഞാന്‍ തന്നെ ഭാഗ്യവാന്‍
നീ മടങ്ങുമ്പോള്‍ ഈ അഭിനയം വേണ്ടല്ലോ
പണ്ടേ ഞാനതിനു മോശമാണ്
നീയും ഭാഗ്യവതി തന്നെ
എത്രയോ പേരെ നീ യാത്രയാക്കിയിരിക്കുന്നു
ഇനിയുമെത്രയോ പേരെ യാത്രയാക്കാനിരിക്കുന്നു
എല്ലാ ഒരുക്കങ്ങളും ആയി, ല്ലേ?
എന്നാല്‍ നമുക്ക് പുറപ്പെടാം
എന്ത്?
എന്നെ ഒന്ന് പൊക്കാന്‍ ആരുമില്ലേ?
നീ ഒരാളെക്കൂടെ വിളിക്കൂ
എനിക്ക് താങ്ങും തണലുമായ ഒരാളെ
അപ്പുറത്ത് തളര്‍ന്നു കിടക്കുകയാണ്
ഞാന്‍ പോയാല്‍ ആരുമില്ലലോ പിന്നെ
ആ പണ്ടങ്ങള്‍ അഴിക്കാന്‍ പറയണം
സിന്ദൂരവും ഒന്ന് മായ്പ്പിക്കണം
ഹോ! നിനക്ക് നല്ല വേഗത തന്നെ
ഇത്ര പെട്ടന്ന് ഇവള്‍ മുന്‍പ് ഒരുങ്ങിയിട്ടില്ല
എന്നാലിനി മടക്കമാവാം