ഹെഡ്മാസ്റ്റർ

വെയിലും മഴയും കൂസാതങ്ങനെ

കാലൻകുടയും ചൂടീടും

പാടവരമ്പുകൾതാണ്ടിനടക്കും

സർക്കാർസ്കൂളിലെ ഹെഡ്മാസ്റ്റർ

ഫയലുകൾ ഭാണ്ഡക്കെട്ടുകളായ് തൻ

കക്ഷത്തിങ്കലിടുക്കീടും

ഒരു കൈകൊണ്ടാ മുണ്ടിൻ കോന്തല

ചേറാവാതെയുയർത്തീടും

നാലുംകൂട്ടി മുറുക്കിത്തുപ്പീ-

ട്ടാലോചിച്ചു ചിരിച്ചീടും

കണ്ണട താഴ്ത്തീട്ടിടയിൽക്കൂടി

കുട്ടികൾ വരുവതു നോക്കീടും

സമയം തെറ്റിയ ശങ്കയിൽ വാച്ചിൽ

ഇടയിടെ നന്നായ് ശ്രദ്ധിക്കും

പാടം കേറി വരുന്നാ ഞങ്ങടെ

പാവത്താനാം ഹെഡ്മാസ്റ്റർ..

ഓർമ്മയിലിന്നും തെളിയുകയാണാ

 പഴയോരെന്നുടെ  ഹെഡ്മാസ്റ്റർ.